Col CK Nayudu Trophy: Pynbna ka M’laya ïa ka kynhun na bynta ki 3 tylli ki jingïakhun ba nyngkong

Shillong, Nailur 25: Ka Selection Committee na ka bynta ka kynhun ïalehkai kriket kiba la rangbah jong ka Meghalaya Cricket Association ka la jied ïa ki 15 ngut ki nongïalehkai bad ki standby na ka bynta ki lai tylli ki jingïalehkai ba nyngkong jong ka BCCI’s Col CK Nayudu Trophy, kaba lympung ïalehkai kaba bun sngi (multi-day tournament) na ka bynta ki shynrang kiba hapoh 23 snem (U-23 men).
Ka samoi ïalehkai kan sdang naduh ka 16 tarik u Risaw ha kaba ka Meghalaya kan ïakhun pyrshah ïa ka Baroda ha madan ïalehkai jong ka Baroda. Nangta ka Meghalaya kan leit sha Jammu ban aireng pyrshah ïa ka Jammu & Kashmir naduh ka 26 tarik u Risaw shuwa ban wanphai sha la ïing ha kaba kan ïakhun pyrshah ïa ka Goa naduh 02 tarik Naiwieng ha Shillong.
Sa shisien pat u Kevin Christopher un ïalam ïa ka Meghalaya kum u kapten, katba u Josiah Momin pat u la shah jied kum u symbud kapten.
Ka prokram pynkhreh jong ka Meghalaya na ka bynta ka Col CK Nayudu Trophy kan sdang ha Tura ha ka 29 tarik Nailur bad kan bteng haduh 12 tarik Risaw. Ki nongïalehkai, ki standby kiba la pynap lypa bad ki support staff na kylleng ka Khasi-Jaintia Hills kin hap ban wanmih ha Polo Ground, Shillong, ha ka 28 tarik Nailur ha ka por 8 baje mynstep shuwa ban leit sha Tura. Katba kiba na Garo Hills (lait noh na Tura) kin wanmih sha Tura ha ka 28 tarik Nailur. Nangta ka kynhun kan mih na Tura ha ka 13 tarik Risaw ban leit sha Baroda.
Ka thup kyrteng jong ka kynhun Meghalaya ki long: Purav Agarwal, Manish Sharma, Sudhir Sahani, PM Santosh, Banialam Mylliemngap, Dipankar Baruah (WK), Sachin Kumar (WK), Josiah Momin (VC), Kevin Christopher (C), Gavineal Marpna, Avinash Rai, Shavian Blah, Navin Kr Ray, Asif Khan, Gulgul Sangma.
Standby: Pushkar Raj Singh, Chandra B Thapa, Raghav Magotra, Thunun Marak, Denikcheng Marak.
Support staff: Neetesh Sharma (head coach), Marty Mustafa (assistant coach), Emidao Dhar (physio), Skhembor Khongbtep (trainer), Chuba R Marak (manager).