Shillong, Ïaïong 15: Ka Meghalaya kala lah ban wanphai biang da kaba pynïakhaid ha ka jingïakhun pyrshah ïa ka Arunachal Pradesh ha ka lympung ïalehkai Col CK Nayudu Trophy na ka plate group kaba la long ha ka sngi Thohdieng ha Cuttack.
Ha ka jingïalehkai kaba saw sngi bad kaba khatduh jong ka inning kaba ar da kaba tied biang ïa ka 69 ron bad duh noh 1 wicket bad lamkhmat da 150 ron, ka Arunachal kala shah pynhap lut baroh ki wicket bad kamai tang 172 ron. U Bipin Kumar Ray u khur 3 wicket ai kamai 48 na bynta ka Meghalaya, katba u Abhishek Kumar u ïoh 2 wicket ai kamai 33 ron, u Adarsh Joshi u ïoh 2 wicket ai kamai 48 4on bad u Sudhir Sahani 1 wicket ai kamai 21 ron. U Agreas Chamcham Sangma u pynkut da kaba ïoh 1 wicket ai kamai 19 ron bad dei tang ma u marwei uba ïoh wicket ha ka sngi Palei.
Kumta ka Meghalaya ka donkam ban jop da 254 ron bad kaba la pynartatien ïa ka kynhun ban jop ha ki 60 over.
Haba beh ïa katei ka ron, ka Meghalaya kala hap noh lai ngut ki wicket kiba kham lah ban kamai bun ron, hynrei u Swastic Chettri (27) bad Joydeepan Deb (40) kila kyntiew sha ka jingkamai ron kaba 69 ron na bynta ka jingduh noh saw wicket.
Ka Meghalaya kala don biang ha tmier hadien ba kine ki arngut kila shah pynhap wicket noh hadien ba ka kynhun kala kynjoh sha ka 73 ron, hynrei na ka jinglah ban kamai ron bha u Md Asif Khan uba kamai 23 ron bad u Joshi 12 ron, kila lah ban kyntiew shuh shuh ha ka jingkamai ron lang. U Joshi u la tied 52 bol katba u Khan 57.
Hadien kine ki arngut kiwei pat kiba la ïarap ïa ka kynhun ki long u Agreas u kamai 3 ron na ki 24 bol bad u Ray u kamai 5 ron (not out) na ki 37 bol ha kaba ka Meghalaya kala pyndep da 118 ron bad duh noh 8 wicket ha ki 60 ban ïoh khur point. Kumta ka Meghalaya ka kiew sha ka kyrdan ba saw napdeng ki san tylli ki team ha ka miej kheiñ point.
Ka Meghalaya kan pynkhreh pat ban ïakhun pyrshah ïa ka Mizoram kaban long ha ka 19 tarik Ïaïong 2022.
