CM: Wat la shah kawang ktieh dei tang ka MDA kaba nud ban syndong kti ban pynbeit pud

Shillong, Nailar 9 : Wat la don bun ki jingkynthoh, jingshah kawang ktieh da ki seng saiñ pyrthei bapher bapher ïa ka sorkar MDA hapoh ka jingïalam ka NPP hynrei kumba ka paw hi ka dei pat tang kane ka sorkar kaba nud ban syndong kti ban pynbeit noh ïa u pud u sam uba la sah teng la 50 snem mynta, namar u Myntri Rangbah ka jylla u Conrad K Sangma mynta ka sngi hadien ba la wai ka jingïalang bad ka Synjuk ki Rangbah Shnong Border Area Raid Nongtung u la ïathuh ba ka jingïapynbeit ïa u pud u sam ha ki hynriew tylli ki jaka ba dang sah ne ka bynta kaba Ar jongka jingpynbeit pud kan sa long noh shen hadien ka jingrakhe ïa ka Sngi Laitluid ka ri India ka ba dei ka 15 tarik mynta u bnai.
Haba kren sha ki lad pathai khubor hadien ba la wai ka jingïalang bad ka Synjuk ki Rangbah Shnong Border Area Raid Nongtung, u Myntri Rangbah u la ong ba ka jingpynbeit pud kan urlong shen sa ka bynta kaba Ar kaba kynthup sa hynriew tylli ki jaka ba ïakajih kata ïa ka Langpih, Block I bad Block II bad na ka liang jong u ryngkat bad u Himanta Biswa u Myntri Rangabh ka Assam un sa shong jingïalang ha Guwahati ha kine ki sngi kiban sa wan.
U la kular ruh ïa ki Rangbah Shnong ba ka sorkar MDA ka dei ka sorkar kaba la rai kut ban pynbeit beit ïa kane ka kam ba la ïai sahteng la 50 snem mynta khnang ban ïa pynkut shisyndon ki jingïakajia kiba pynthut ïa ki paid khappud na ka por sha ka por.
U Myntri Rangbah u la ïathuh ruh “Ka sorkar ka sa thaw noh shen ïa ki Regional Committee na ka bynta kane ka kam. U la ong ruh ba ha kane ka kynti ruh ki Khlieh Nongsynshar, ki trai jaka, ki District Council kin don bynta lang ha ka Regional Committee.
U Myntri Rangbah u la ong ruh ba ka kam pynbeit pud ka dei ka kam kaba kyllaiñ kaba ym lah ban pyndep tang shisngi arsngi hynrei kaba donkam ban da ïatai ïathir bin-pa-bin.
U la ong ruh ba ha ka Bynta ba Ar kan long kaba kham eh bad kham kyllaiñ ym kum ha ka Wat kaba Nyngkong kaba ka jingpynbeit na ka liang ka Assam ka dei beit tang bad ka sorkar hynrei ha kane ka kylla kaba mynta ka Karbi Anglong District Council ruh kan don bynta lang.
Haba ïadei bad ki kam pynroi kiba ka sorkar Assam ka ju wanrah sha ki jaka ba don jingïaknieh pud u Myntri Rangbah u la ong ki paidbah ki dei ban pdiang beit namar ki kam pynroi kim lah ban long u mawser ban thew ïa ka jinglong trai da kano kano ka jylla ïa kita ki jaka.
Ki Rangbah Shnong jong ka Raid Nongtung ki ïathuh ba ka jingkynduh bad u Myntri Rangbah ka jylla ka long ban kyrpad ba ka sorkar jylla ka dei ban ïakhun ban ïoh biang ïa ki 18 tylli ki shnong jong ka Raid Nongtung ne Block II kiba la shah pynhap jubor sha Assam ba ki dei ban phai biang noh sha ka jylla Meghalaya.
“Ngi la buh ka jingkyrpad ba ka sorkar ka dei ban ïakhun ban ïoh biang ïa kine ki 18 tylli ki shnong jong ka Raid Nontung jong ka Hima Khyrim kiba la shah pynhap jubor sha ka Assam namar ngi kum ki nongshong shnong ngi kwah ban don sha ka jylla Meghalaya” ong u Bah Blikstar Sohtun Chairman synjuk haba kren bad ki lad pathai khubor.
Shuh shuh u Myntri Rangbah u kyrmen skhem ba ki ar jylla kin lah beit ban pynbeit ïa kane ka kam ba dang sahteng ha kine ki hynriew tylli ki jaka wat la kan shim por katto katne por ruh.
U Myntri Rangbah u la ïathuh ba ha ka jingleit ïashim bynta shaka jingïalang jongka Governing Body jongka NITI Aayog kaba la long ha nongbah Delhi dang ha kane ka Sngi U Blei ba la dep, u la ïoh lad ban ïa kynduh bad ïa kren sani bha bad u Myntri Rangbah ka Assam u Himanta Biswa Sarma bad kumta la ïarai lang ba ka jingïakynduh kaba nyngkong ban ïakren ïa kane ka jingpynbeit ïa pud u sam ha kane ka Wat kaba Ar kan long hadien ka Independence Day.