Bythen ka HNYF ïa ka sorkar bym dei ban soi soskular kulmar ïa ka jingpynbeit pud

Nongpoh, Nailar 20: Shuwa ba ka sorkar Meghalaya bad ka sorkar Assam sa shisien kin ïa pynbeit ïa u pud u sam kiba ïa kajia pud na ka por sha ka por hapeng ka Assam bad ka Meghalaya, ka HNYF Northern Region mynta ka sngi ka la byrthen lypa ïa ka sorkar jylla ba kam dei ban shu soi mattlah ïa ka rai khlem da hun ki paidbah bad khamtam ki nongsynshar Raid bad ki nongsynshar Hima kiba tip kham bha ïa u pud u sam ka jylla lyngba ki jingdon ki kot ki sla bad ki jingpynshisha.
Kum ba pynkynmaw, ka sorkar jylla ka la dep ban pynbna paidbah ruh lyngba ki lad pathai khubor ba shen kin sa ïa kren ïa ka kam pynbeit pud kiba dang sahteng hapdeng ka Assam bad ka Meghalaya bad dei namar kane ka daw ka HNYF ka mih ba pynpaw ïa ka jingsngew ba kam hun satia halor ka jingpynbeit pud ba la dep ban ïa pynbeit bad la soi ruh ïa MOU ba bun ki jaka ka Meghalaya ki la leit noh sha ka jylla Assam.
Haba ïa kren mynta ka sngi bad ki Nongthoh Khubor, u President ka HNYF Northern Regioin, u Bah Marcus Marten, u la ong ba ka seng HNYF kam kwah ba ka sorkar Meghalaya ha kane ka kynti kaba ar kaba dei shaphang ki kam pynbeit pud kan shu leh klumar khlem da ïaid na u paidbah bad ki jingshisha ki paw ruh dang shen hadien ka jingïasoi ïa ka MOU kiba bun ki paidbah na Meghalaya ki pyrshah jur namar wat ki jaka jong ka Meghalaya la shah pynhap noh sha Assam kaba ki paidbah kim don jingtip satia.
U Bah Marcus Marten, president ka HNYF u la kren shai ruh khamtam ïa ka Block II bad kiwei ki jaka ba dang sahteng ban ïa pynbeit ba kum ka seng kam kwah satia ba wat tang shi inshi ruh kan leit sha ka Assam bad shuwa ban shimm ïa ka rai kaba khatduh ka sorkar Meghalaya ka dei ban sngap ïa ka sur ki paidbah bad khamtam ki trai jaka, ki nongsynshar Raid bad ki nongsynshar Hima kiba tip kham bha halor kane ka kam pud ka kam sam lyngba ki kot ki sla ne ki dulir.
U la kynthoh ruh dang shen ha ka jingïapynbeit pud, kiba bun ki jaka ki leit sha ka Assam ka dei namar ba bun kito kiba shong basah ha kitei ki jaka khappud ki dei ki bar jylla kiba na Assam bad dei namar kane ka daw khlem da tih bniah lyngba ki kot ki sla ne ban pynshisha lyngba ki trai jaka bad ki nongsynshar Raid bad Hima ki jaka jong ka Meghalaya ka leit noh sha ka jylla Assam, u la ong.
U la pynpaw ruh da kaba ong ba ka nongrim kaba la pynlong ba kin don shibun ki jaka ka Meghalaya ki la shah kynthup noh sha ka Assam ka dei namar ha kiba kum kitei ki jaka, la shong ba sah da kiwei pat ki jaidbynriew ki bym dei Khasi bad u la ai ruh lyngba ka nuska kum ki jaka ka Meghalaya ba hap ha ka Raid Marwet bad ki jaka kiba don ha Hima Nongspung ka leit noh sha ka Assam.
U la kren shai ruh da kaba ong, ba ka seng kam kwah ba ka sorkar kan shu shim ïa kane ka rai ban ïa pynbeit pud tang ban pynsngewbha ïano re ïa no bad shuwa ba kan shim ïa ka rai na ka bynta ka Block II bad kiwei ki jaka ba dang sahteng ban ïa pynbeit ka dei ban ïaid bin pa bin na ki nongshong shnong bad ki nongsynshar Raid bad Hima, namar ha kaba ïa dei ba kane ka kam kitei ki tip kham bha khamtam lada shim lei lei lyngba ki kot ki sla ne ki dulir kiba la don lypa, u la bynrap.
Shuh shuh, u la bynrap ruh ha Block II, kiba bun hi ki dei ki paid Khasi bad baroh ki kwah ban don sha Meghalaya bad ym sha Assam bad kum ka sorkar shuwa ba shim rai hapdeng ka sorkar Meghalaya bad ka sorkar Assam ka dei ban da tih bniah bha bad ym ban shim rai klumar kaba long ka jingduhnong ïa ka Meghalaya halor ki jaka ki puta bad khamtam ki paid Khasi khara kin duh mynsiem bad kim kwah satia ban leit sha ka jylla Assam, u la bynrap.
Halor kane ka kam pud ka kam sam ban sa ïa pynbeit ha ka wat kaba ar, ka seng ka dawa jur ba ka sorkar Jylla kan ïaid da kaba ïa sngewthuh katkum ka sur ki paidbah babun balang bad lada kane ka jingïapynbeit pud kan long biang kum ha kine ki por ba la dep ka seng kam banse ban shim da kiwei ki lad ki lynti ryngkat ki paidbah na ka bynta ban ïada ïa ka khyndew ka shyiap jong ka jylla Meghalaya, u la bynrap shuh shuh.