Byrthen u CM ban leh da kaba tyngeh halor ka jingïap u samla ACHIK ha Goalgoan, WGH

Shillong, K’Lyngkot 10 : U Myntri Rangbah ka Jylla Conrad K Sangma ha ka sngi saitjaiñ u la pynbna ban leh da kaba tyngeh ïa kito kiba donkti halor ka jingïap u dkhot jong ka ACHIK ha Goalgoan kaba hap hapoh Rajabala Police Station ha West Garo Hills district, da kaba pynthikna ba baroh ki nongleh kam sniew kin ngat ha ki kyndon aiñ.
Kane ka jingjia ka la jia ha ka sngi Thohdieng mynsngi ha kaba u dkhot ka ACHIK u Dilseng M Sangma la kynnoh ba u la shah thombor ha ki briew ki bym lah satia ban ithuh ha Goalgoan.
La ïathuh ba mardor la pynkit noh sha Bhaitbari Community Health Centre bad hadien la phah sha Tura Civil Hospital, hynrei u la khlad noh na ka jingmynsaw katba dang pynkynriah ïa u ban ïoh ïa ka jingsumar kaba kham bniah.
Ha ka khubor lyngba ka video, u Myntri Rangbah u la ong ba katei ka jingjia, kaba la jia hynnin ka sngi ha Garo Hills, ka la pynlong ïa uwei u samla ban duh ïa ka jingim bad uwei pat u la mynsaw jur.
Haba pynrem ïa katei ka jingjia kaba sngewsih bad pynpaw ïa ka jingsngewlem sha ka iing ka sem kaba la duh noh, u Myntri Rangbah u la ong, “ Ngi la pynrem ïa kane ka jingjia bad ha kajuh ka por ngi la pynpaw ïa ka jingsngewlem sha ki dkhot jong ka iing ka sem.”
“Hynnin ka miet, ki pulit jong ka West Garo Hills mardor ki la pynlong ïa ki jingkhynra ha ki jaka bapher bapher, bad lai ngut ki briew ki la shah kem bad ki pulit ki dang trei shitom ban lap ïa kiwei pat ki briew kiba donkti ha kane ka kam runar kaba shyrkhei,” u la bynrap.
Shuh shuh la ong ba na ka liang u Deputy Commissioner u la khot ïa ka jingialang bad ki seng bhalang ban thaw ïa ka komiti ïasuk bad ban ïakren bnïah ïa ki kam ba ïadei bad kane.
U Myntri Rangbah ka Jylla ula kyntu ïa ki nongshong shnong ban pynneh ïa ka shongsuk shongsaiñ bad ban bishar bniah ïa ki khubor kiba phriang ha ki social media ki bym pat pynshisha. U la ban jur, “Ha kum kane ka por nga kwah ban kyntu ïa baroh ki nongshong shnong ka Garo Hills ba ngi dei ban pynthikna ba ka jingsuk bad ka jingïatylli kan ïai bteng ban don ha Rilum Garo. Kin don shibun ki khubor kiba lah ban saphriang ha ki social media, sngewbha ban bishar bniah bha ïa ki.”
U la pynthikna ïa ki paidbah ba ki pulit bad ka bor synshar ki trei shitom ban pynthikna ba kin leh tyngeh ïa baroh kiba donkti.
“Ha kum kane ka por, to ngan pynthikna ïa ki nongshong shnong ba ki pulit bad ka bor synshar ki don ha ka kam bad ngin pynthikna ban leh da kaba tyngeh bad baroh ki briew kiba donkti ha kane ka kam runar kin shah pynngat ha ka aiñ.”
U heh pulit jong ka District u la pyntip ba ki kynhun pulit ki la pynlong ïa ka jingkhynra ha ka miet jong ka sngi palei, kynthup ha ka iing sah jong uwei u trai parmaw uba la suba ba u don jingïadei bad katei ka jingjia.