Nongstoiñ, Risaw 22: Ka synjuk ki nonghikai jong ki skul kiba hap ha ka jingpeit jong ka Sarva Shiksha Abhiyan hapoh ka jylla, kaba la tip kum ka All Meghalaya Sarva Shiksha Abhiyan School Teachers Association, kaba la ju dawa na ka sorkar na ka por sha ka por ba kan pynkiew noh ïa ka tulop jong ki, ki la byrthen ban bteng biang ki jingïakhih lada ka sorkar kam sngap ïa ki jingdawa.
Ka seng kaba la pynlong ruh da ki jingïakhih ha kaba ha u snem ba la dep lyngba ka jingïakhih da kaba shong kyllaiñ mungor ha madan Malki kaba la neh da ki taïew, ka la pynlong ïa ka sorkar ba kan khot ïa ki ban wan sha ka miej jong ka jingïakren sngewthuh jingmut bad hadien ba ka sorkar ka la kular ban shimkhia ïa ki mat jingdawa ki la pynsangeh noh ïa ka jingïakhih.
Ha kane ka sngi hat majai ka 21 tarik Risaw, ki nongïalam jong katei ka synjuk ha ka jingïakren bad ki lad pathai khubor ki la ong ba haduh mynta kim pat weng satia ïa ka jingïakhih, hynrei ki shu pynsangeh shi por bad lada ka sorkar kam pynurlong kumba ka la kular kin bteng biang ïa ka jingïakhih.
U babu Peter Thyrniang president katei ka synjuk u la ong ba naduh ba ki la sdang ïa ki jingïakhih, ka sorkar ka la pyrshang ban pynurlong ïa ki katto katne ki mat jingdawa. Hynrei kam shym pat la pyndep lut ïa ki mat ba don kam ba ka synjuk ka la buh ban aiti sha ka sorkar da ki jingthoh.
U la ong ruh ba ki dang bun ki mat kiba ka synjuk ka angnud ba sorkar ka dei ban pyndep, kumta ki dang ïai ap ba ka sorkar kan pynurlong noh kham kloi, khnang ba ki nonghikai baroh kiba don hapoh ka shatri jong ka AMSSASTA kin ïoh lem ïa ka hok kum ba ïoh kiwei pat ki nonghikai.
