Byrngem ujor mukotduma ka sorkar ïa u Nongaiktien ka AITC

Shillong, Nohprah 5 : Ka sorkar ka la byrngem ban ujor mukotduma ïa u National Spokeperson ne Nongaiktien ka AITC u Saket Gokhale halor ka jingkynnoh jongu ba pyndonkam bakla ka sorkar ïaka pisa haduh 632 klur kaba dei ka pisa na ka bynta ka Meghalaya Ecotourism Infrastructure Development Project (MEIDP).
“ Ka sorkar ka la shim khia bha ïa kane ka jingkynnoh ba khlem nongrim bad kan ujor da ka mukotduma pyrshah ïa u Gokhale” ong ka khubor kaba la pyllait da u Commissioner bad Secretary ba dei peit ia ka tnad Planning u Vijay Kumar.
La pynpaw ba ka sorkar ka kyntait lut ïa kine ki jingkynnoh kiba ym don nongrim bad bym shisha. La ong ba une u nongpathai khubor ka AITC u la ju myllien kumne ban shu kynnoh khlem nongrim ïaka sorkar bad ka jingthmu jongu ka long ban ïalam bakla beit ïa ki paidbah.
“ U Gokhale um ju wad bniah ïa ki jingshisha na ka sorkar ne na kino kino ki tnad treikam jongka ban ïoh jingtip kaba thikna ne bishar ne peit wat tang kiba don ha ka website https://meghalayatenders.gov.in” ong ka khubor.
La ïathuh ba ka Meghalaya Age Limited (MAL) ka dei ka kompani jongka sorkar hapoh ka jingpeit ka Planning Department bad la thaw ïa ka kat kum ka Section 2 (45) of the Companies Act 2013.Ka pisa ba la mang na ka bynta ka Meghalaya Ecotourism Infrastructure Development Project (MEIDP ka long 731 klur tyngka bad ka dei kaba la bei pisa da ka New Development Bank (NDB) kaba dei ruh ka Externally Aided Projects (EAP).
Kat kum ka EAP ba la pyntreikam da ka sorkar pdeng ha kane ka thaiñ shatei lam mihngi, ka sokar pdeng kan bei 90 % ka pisa kum ka Grant bad 10 % ka dei ka jingpynlut na ka sorkar jylla.
ïa baroh ki Tender jongka MEIDP la leh kat kum ki kyndon jongka sorkar jylla bad la pynskhem bad mynjur da ka Agency kaba bei pisa kum ka ram kata ka New Development Bank. Kumta ïaki jingtip ba bniah baroh la buh ha ka website https://meghalayatenders.gov.in.
Kumta la ong da ka khubor ba la pyllait da ka sorkar ba kine ki jingkynnoh jong u Gokhale ki long kiba khlem nongrim bad ki bym shisha. Halor ka jingkynnoh ba ïa ki kyrteng jong ki contraktor ym shym la pynbna paidbah u Commissioner bad Secretary u la ong ba ïa ki tender baroh la khot da ki tnad bapher bapher ka sorkar hi kata kum ka PWD, Tourism, State Sport Council bad ka jingkhot tender bad plie ruh ka long beit da kaba bud pyrkhing ïa ki kyndon bad hadien kata sa pynskhem da ka NDB. Halor ki jingkynnoh ba kiba bun ki projek ki dei ki surok, u Commissioner u la pynshai ba na kane ka pisa ba la mang ha kane ka projek tang 14 % ki dei na ka bynta ki surok bad ïa ka jingpyntrei ruh la leh beit da ka tnad PWD. Lah ban ong ruh ba ka kam jngohkai kan ym kiew lada ym biang ki surok na kata ka daw la pynbha ïa ki surok ban kiew kane ka kam. Nalor kata ki don ki surok kiba la pyntrei noh na ka pisa ba la bei da ka sorkar pdeng kata na ka prokram Sadesh Darshan bad Prasad. Halor ka jingkynnoh ba khlem buh jingkheiñ jingdiah da ka Meghalayan Age, la ïathuh ba ïa ki jingkheiñ hap ban ai sha ka New Development Bank bad la peit ïa kine da ka Project Management Unit (PMU) namar ka dei kane ruh kaba peit ïa ka jingïaid ki kam ki jam.
Nalor kata la pynshai ruh ba ka jingkynnoh ba la shu khot tender katba mon ha kine ki lai bnai ba la leit noh, u la ïathuh haduh mynta ki don tang 8 tylli ki projek kiba heh ba la khot tender. Na kine 2 tylli la khot ha u Nohprah 2021, 4 tylli ha u Lber 2022 bad ar tylli ha u bnai Nailar bad Risaw 2022. Halor ka jingkynnoh ba ka don ka jingthmu ban pyntreikam ïaki projek ba 219 klur shwa u Nohprah bad ban ïasoi ïa ki kot ki sla ha u Kyllalyngkot la ong ba kam long kaba shisha namar baroh ki projek la bud beit kat kum ki kyndon khot tender jongka sorkar. Nalor kata hap ban khot ruh hadien ba la ïoh jingmynjur na ka NDB.
Kumta kumba la kdew ba na ka ram 90% ka dei ka grant na ka sorkar pdeng bad 10 % ka dei ban hap siew da ka sorkar jylla bad na ka bynta kawei ka projek la ai por hapdeng 12-20 snem ban siew ha ka sut kaba rit.