Byrngem u heh Pulit ïa ka ophisar jong ka State Commission for Women

Shillong, Naitung 09: Ka Chairperson jong ka State Commission for Women, ka Kong Phidalia Toi, mynta ka sngi ka la pynkyndit thret haba ka la phla ba uwei u heh Pulit u la byrngem ïa kawei ka ophisar jong ka Commission hadien ka jingïalang ba la khot da ka Assembly Committee on Women Empowerment kaba la long ha ka 20 tarik u bnai baladep.
Ka Kong Phidalia kala phla ïa kane hakhmat ka jingïalang ba la khot da ka tnad Pulit ha Police Headquarter ban ïaphylliew jingmut halor ki lad jingïada ïa ki kynthei. Ha kane ka jingïalang la don lang u DGP, u Dr. LR Bishnoi, ki IGP, ki SP bad kumjuh ruh ka Chairperson jong ka Meghalaya State Commission for the Protection of Child Rights (MSCPCR) Kong Ïamonlang Syiem bad kiwei kiwei de ki ophisar bad nongtrei na ka bynta ka jingïada ïa ki Kynthei.
“Shuwa ba ngan kren, nga kwah ban pynpaw ka jingpyrshah ïa kawei ka jingjia kaba la jia ha ka 20 tarik u Jylliew 2022 bad kata kadei hadien ba la wai ka jingïalang ba la khot da ka Assembly Committee, ha kaba uwei u heh Pulit u la byrngem ïa ka ophisar jong ka Commission”, la ong i Kong Phidalia hapdeng ka jingkyndit bad jingsaw kyrang ki heh Pulit ba don ha kane ka jingïalang.
Da kaba pynpaw ba im kwah ban ïathuh ïa ka kyrteng jong une u heh Pulit, i Kong Phidalia, i la ong ba kane kadei ban long ka sien kaba nyngkong bad kaba khatduh bad kam dei ban jia shuh hadien habud. “Lada kat ïa ka ophisar jong ka State Commission u dang nud ban byrngem kumne, katno tam lei ïa ki paidbah paidkar’, i la ong.
Ha kajuh ka por, i la ong ba kin klet noh ïa kane ka jingjia bad nym dawa panmap na une u heh Pulit,hynrei kin ïatreilang na ka bynta ka jingbha bad ka jingïada ïa ki kynthei ha ka jylla.
Katei ka jingïalang ba la khot da ka Committee ba la khlieh da ka Kong Ampareen Lyngdoh, MLA kadei hadien ka jingshah pynïap ki arngut ki khun ha u kpa kaba la jia ha ka shnong Nongrah. Na ka liang ka Committee kala khot hajir ïa ki Pulit, ki ophisar jong ka State Commission for Women, ki ophiar jong ka Meghalaya State Commission for the Protection of Child Rights bad kiwei kiwei ki tnad sorkar ban wad jingtip halor ka jinglong ka jingtohkit halor kane ka jingjia kaba la pynsuh jer ïa ka jylla.