Byrngem u CM, ngan kynduh markhmat ïa ki heh ka US, MHA bad MEA ba khang ka US ïa ki paidbah

Shillong, Jylliew 23 : U Myntri Rangbah ka Jylla, Conrad K Sangma ha ka sngi Nyngkong u la ong ba un sa leit ban kynduh markhmat ïa ki heh ka United States ban ïoh jingshai halor ka jingmaham jong katei ka ri ïa ki paidbah ba kin wan sha ka thain shatei lam-mihngi jong ka Ri, kaba long thik kumba khang lang ïa ki ban wan sha Meghalaya.
“Shen ngan sa kynduh markhmat ïa u Nongrah Ktien Syiem jong ka US bad ngin pynshai lut ïa ki jingshisha baroh ha ki khnang ba kidei bad pynbeit bad pynshai lut ïa baroh ki jingpynbna kiba bakla lut. Nga kyrmen ba kin lah ban pynbeit noh,” u la ong haba kren ha ka jingïalang jong ka CM Connect ha Mawkdok hadien ba uwei na ki nongshong shnong u la ïeng ban ai khublei ïa ka sorkar jylla kaba la lah ban sei pyrthei lut ïa ka jingshah pynïap u Raja Raghuvanshi dang shen ha Sohra.
U Myntri Rangbah u ong ruh ba ka long kaei kaei ka bym sngewtynnad ban ïohi ïa ki ri kum ka US kaban maham ia ki nongwankai ban wan sha ki jylla jong ka ri kum sha Meghalaya.
Nalorkata, u Myntri Rangbah u la ong ruh ba un leit ruh ban kynduh ïa ka tnad Kampohiing ka Ri (Ministry of Home Affaris) bad kumjuh ruh ïa ka tnad Kam Barri (Ministry of External Affairs) ka sorkar pdeng nalor kiwei kiwei ki tnad ba dei peit ban tuklar lang halor kane.
Nangta, u ong ruh ba ïa mynta hi, kum ki paidbah ki dei ban ïai bteng ban pdiang sngewbha ïa ki nongwan jngohkai pyrthei kiba wan sha ka thain bad ai kaba bha tam na ka bynta jong ki.
Ha kane ka sngi u Myntri Rangbah u la pynbna ruh ba shen kin sa lah ban pynmih noh da ka kynhun jong ki pulit tourist, kiban peit kyrpang ïa ki nongjngohkai pyrthei ha kito ki jaka ba bun bha ki nongwan jngohkai pyrthei.
U ong ba ka kamram jong ki, ka long ban ai jingtip, ai jingïada ïa ki nongwan kai khnang ba kin sngew shngain haba ki wankai sha kane ka thain.
Shwa kane, haba ai khublei ïa utei u rangbah uba la mih shakhmat ban ai khublei ïa ka sorkar jylla bad ruh ïa ka tnad pulit, u Myntri Rangbah u la ong ba kadei ka jingshisha ba ki pulit Meghalaya ki la trei borbah ban sei pyrthei ïa ka jingjia ba dang shen. “Hynrei nga dei ruh ban ai khublei ïa ki paidbah ka thain, ki nongïalam lynti, ki kynhun bapher bapher, ki nongpynïaid ïa ki jaka jngohkai pyrthei bad baroh ki la wanlang hajuh da kawei ka bor ban ïa treilang.”
U ong ruh ba dei lyngba kane ka rukom treikam lang kaba la pynlong ïa ki pulit bad ki kynhun kyrpang ban lap bad sei pyrthei lut ïa ki jingjia baroh.
“Nga kwah ban ai khublei kyrpang ïa ki paidbah baroh kiba la don bynta lang ha kane ka kam. Khublei shibun,” la bynrap biang u Myntri Rangbah.
Ha kane ka sngi, ki paidbah na kylleng ki bynta jong ka Khatarshnong Laitkroh Block ki la ioh ia ka lad ban pynsngew ha khmat u Myntri Rangbah ia ki jingeh ba ki kynduh la ka long ha ka liang ka umbam umdih, ka surok, khaw rashon, ki iing baduk , ki jaka sumar, ka bording, ki jaka pule, ki jaka ialehkai bad kiwei kiwei.
Na ka liang u Myntri Rangbah kumba ju leh, u la ialam lut ai baroh ki heh sorkar jong man la ki tnad ba kin don ha katei ka sngi bad ban pynshai ruh ia ki paidbah. Ym tang katta u da tuklar hi ruh dalade ban pyntikna ba ia ka jingeh ki paidbah dei ban buh hakhmat bad ban pyrshang mardor ban pyndep.