Shillong, Risaw 14 : U Vice President ka HYC Sengkmie u Bah Donboklang Kharlyngdoh u la kyntu ïa ka sorkar ba kan khynra drok hapoh ka Themetor kumba khynra lehnoh ki pulit ha ki 15-20 snem mynshwa.
U la ong ba ha ka por ba khynra lehnoh ki pulit ki la rah ïa ki bahaïing, ki para ne hynmen jong kito ki lehnoh bad ki pyndik ïa ki bad u la ong ba haba khynra ïa u drok ha Themetor dei ban rah lang ïa ki hynmen ki para ne ki bahaïing jong ki nongkhaïi drok ha kane ka jaka.
Ïa kane u la kren sha ki lad pathai khubor hadien ba ki pulit ki la khot hajir ïa u Secretary ka seng u Bah Issac Basaïawmoit hapoh Rynjah Police Station ha ka sngi Nyngkong. Katba u Secretary u Bah Basaïawmoit u la ong ba ka daw ka jingshah khot kadei halor ka jingbat ïa ki nongkhaïi drok ha Rynjah. “Ha kato ka sngi ngi la kyrpad ïa ki pulit ban ap shwa ba ka seng kan tohkit bad haba khlem pyntip ïa ki pulit ruh hynrei ki la wan hi bad ngi la ong ba hadien ba ngi la pyndep ïa ka kam ngin sa aiti sha ki pulit hynrei da la dep ka kam haba la aiti sha ki pulit ruh kim treh kumta hadien kane ngi la aiti noh sha ki bahaïing,” ong u Secretary. Haba kylli lano ki pulit kin phah wan hajir biang, u Secretary u la ong ba ki pulit kila ong ba lada donkam ban phah wanmih biang kin sa pyntip ïa u.
Katba na ka liang u President u Bah Roy Kupar Synrem u la ong ba ka jingshah khot hajir u Secretary la kynnoh ba ki nongïalam ka seng ki la khanglad ïa ki pulit ban pyndep ïa la ka jong ka kamram.
“Hynrei ngi kwah ban kylli ïa ki bor sorkar bad ki pulit ba jin lada ki trei la ki jong ki kamram ka HYC kam donkam ban mih sha surok bad dei namarba kim pyndep la ka kamram ka sa pynlong ïa ngi ban hap mih sha surok bad ka jingkynnoh ba ngi khanglad ïa ki pulit ka long kaei kaei kaba sngewthamula,” ong u Bah Roy.
“Ngi la lap mynta la 2 ne 3 sien ba ngi la bat kylleng ka sor Shillong khamtam kiba die drok bad haduh mynta ngi la shah pynngat haduh 2 tylli ki case kane ka pynsuba jur ïa ngi ba imat lada bat ïa ki briew kiba don bynta bad ki high level, ki briew jong ngi kin shah pynngat case, kane kadei ka jinglap ka HYC haba ka seng ka la shah khot hajir hapoh Rynjah PS bad Sirdar PS,” u la bynrap.
U la ïathuh ba ka seng ka la bat da ki spah ngut kiba dih drok bad kumba 140 ngut tam ka seng ka la phah sha ki Rehabilation centre, kumta ka sorkar, ki pulit ki la leh aïu, kumta kim dei ban pyntieng ïa ka seng namar kan bteng beit ban rat dyngkhong ïa u drok napoh ka ri Khasi Jaiñtia. “Ngi sngewthuh ïa ka jingjynjar bad ka jingpait dohnud ki bahaïing hynrei lada ki bor pulit ki dang bteng ban leh kumne yn sa ïohi ïa ka jubab kaba wan na ki paidbah.
Ka seng kan buddien ïa kito ki heh ki haiñ ba donkti ha ka kam khaïi drok bad lada lap ïa ki sabut ba thikna ngin sa thad paidbah. Ngi ai khublei ruh ïa kito ki pulit kiba ju kyrshan ïa ka seng bad ki bym don bynta bad ki high level,” ong u President ka HYC sengkmie.
