Shillong, Nailur 07: Ka kynhun ki nongshad nongrwai bad ki riew donsap ha ka jylla hapoh ka jingïalam ka All Meghalaya Dancers Association(AMDA) ki la dawa ba ka sorkar ka dei ban pynurlong noh ïa ka jingdawa kaba ka AMDA ka la dawa naduh u snem 2003 ban ai jingkyrshan pisa ïa ki riew donsap bad ban buh ki institute na bynta jong ki ly kumta kin mih surok ban ïakhih na bynta kane.
Haba kren bad u Samla Gabriel Mawlong u la ong ba ka sorkar ka dei ban pynurlong noh ïa kaba ka AMDA ka dawa namar ka dei ka jingdonkam ka khyllipmat bad don ka Institute bad ba ka sorkar kan ai jingkyrshan pisa sha ki riew donsap kiban leit ïakop sha ki rynsan bapher bapher.
“Bun ki samla kiba ïoh leit ïakob sha kylleng ki bynta ka ri hynrei namar ki wan na ka ïing ka sem ba duna ka ïoh ka kot ki duh nohh ka kabu ban sei pyrthei la ka sap” u la ong.
“Wat la ka AMDA ne ki seng bad ki association kin kyrshan ïa ki riew donsap naei kin ïoh pisa namar ka sorkar kam ju ïarap ïa ki bad kaei kab ki ïarap ruh ka dei na pla lajong ki dkhot ka seng bad ka jingnoh kylluid mynsiem ki katto katne ki nongleh bha” u la bynrap.
Shuh shuh u la ong ba ka AMDA ka ju plie ki lad ki lynti ïa ki khun samla na ka por sha ka por ym tang hapoh kane jylla Meghalaya hynrei ka ju btin lynti ruh ïa ki sha kiwei pat ki rynsan ïakop hapoh ka ri India jong ngi ban wanrah nam ym tang ïa ka iing ka sem hynrei ïa ka jylla hi baroh kawei.
“Ka sorkar ka dei ban pynurlong noh lada ka sngap mynti ngin mih surok namar ka aiom jong kane ka sorkar kan sa kut noh shen bad ngin leit sha ka General Election. Naduh ka sorkar barim bad ka sorkar ba mynta ki dei kiba matlah ki khmat kiba kyllut ki skhor kumta na ka liang jong ngi baroh ki samla donsap ngi kyntu jur ïa kane ka sorkar bad kumjuh ruh ïa ki sorkar ban ba ki dei ban wan thymmai ithuh noh mardor ïa ka AMDA lyngba ka Art’s and culture department Jong ka sorkar.
