Shillong, Nailar 11: Ka Meghalaya Midday Meal Workers Union ka ba dei ka kynhun jong ki nongshet bam ja sngi ha ki skul ki la ai por tad haduh mynta u bnai ïa ka sorkar ban kyntiew noh ïa ka jingsiew lym kumta kim banse ban shim noh da ki lynti kiba kham tyngeh.
“Da ki phew snem ngi la ïoh katjuh ka tulop kaba 1000 tyngka shibnai sa katno pat ngin ïai shah,” ong ka President jong ka Union Kong Bilin Kurbah haba kren bad ki lad pathai khubor.
Shuh shuh ka ong ruh ba ka paw mynta ba ka sorkar kam sngewsynei ne patiaw ïa katei ka jingkyrpad jong ki. “Kumta, ngi kyntu ïa ka sorkar jylla ba hapoh mynta u bnai kan kyntiew noh ïa ka tulop lym kumta ngin ym lah shuh ban shu ïai shah bad ngim banse ban pyni noh da ki kam. ”
Da kaba ïathuh ba ki don haduh 18000 ngut kiba ju shet bam ja sngi, ka Kong Bilin ka ïathuh ruh ba katei ka jingsiew ba ki ïoh kam ïahap shuh bad ka kam ba ki trei.
Haba bynrap lang u Bah Kenneth Shadap uba la wan ban synran lang ïa ka kynhun u la ïathuh ba naduh u snem 2018 ki la ju ïai thoh sha ka sorkar na bynta katei ka jingeh ba ki kynduh hynrei kim shym la ïoh satia ka jubab haduh mynta.
“Ka sien ba khatduh eh ba ngi thoh sha ka sorkar kadei ha u Naitung mynta u snem hynrei kane ruh haduh mynta ka dang sahkut kumto, ” u la ong.
Shuh shuh u ong ruh ba ki isynei haduh katta katta ïa kitei ki nonghikai namar ki hap beit ban pynlut haduh kumba 6 kynta ha ka shisngi naduh ba shet haduh ban da pynkhuid ïa ki tiar ki tar katba ka jingsiew pat ka long kaba duna.
