Shillong, Naitung 18 : Ka Meghalaya Government LP School Contractual Teacher’s Association, kaba dei ka kynhun ki nonghikai ba la shah weng kam noh dang shen, ki la byrngem ba kin leit ban pynlong da ka jingshah thngan ha iing u Myntri Rangbah ka jylla lada ka sorkar jylla kam thungkam biang ïa ki mardor.
“Ngi ai por artaiew bad lada phim ai ïa ka result hapoh artatiew ngim banse shuh ban shong shah thngan biang sa shisien ym dei shuh ha madan Malki hynrei ha iing sah jong u Myntri Rangbah,” ong u President ka Association, Bah B Riangtem haba kren bad ki lad pathai khubor.
Utei u nonghikai u la ïathuh ba ki la don haduh shi hajar tam ki nonghikai kiba la shah weng kam kum ki nonghikai kontrak ha ki skul LP jong ka sorkar. “Don napdeng kitei kiba la khlad noh na ka daw ka jingkhuslai mynsiem,” u la ong.
La ïathuh ruh ba na kitei ki 1000 tam ki nonghikai tang kumba 400 ngut ki la pyndep ïa ka Meghalaya Teacher Eligibility Test hynrei kiba bun hi ki khlem lah shuh ban pyndep ïa ka namar kiba bun ki la heh ka rta.
U Bah Riangtem u ong ruh ba mynta kin ap shwa ïa ka jubab jong ka sorkar halor katei ka jingkyrpad ba ki buh bad lada ka sorkar kam patiaw kim banse ban shim ïa sienjam kumba la pynbna.
