Byrngem mih paidbah ka Umlaper lada ym pyllait lynti iaid ka company Amrit

Khliehriat iaiong 27: Ki paidbah nongshong shnong jong ka shnong jong ka shnong Umlaper, East Jaintia Hills District, ki la buh por haduh ka sngi saitjaiñ ba lada ka company dewbilat, ka Amrit Cement Ltd kam pynpra ïa ka kynroh kaba khang lynti, ki paidbah nong shnong shnong kim banse ban mih paidbah ban pynra hi ïa ka kynroh.
Ha kajuh ka por la ong ruh ba watla ka company bad ki nongshong shnong ki ioh kyrhai ka bor ding electrict, hynrei kaba pynsgew khia ïa ki paidbah pat ka long ba ka rukom pynieng ïa ki post electrict bad ka rukom buh ïa ki tiar electric ba la pyntrei da ka company Amrit ka buh jingma haduh katta katta ïa ki paidbah.
Katkum ka shithi kaba myn ha ka 18 tarik mynta u bnai ba la soi kyrteng da u Chairman shnong Umlaper, u bah P.Pdang lem bad ki nongshong shnong, ba la phah sha u Senior Manager jong ka company Amrit, u Pawan Yadav, la pynpaw ba ka don kawei ka lynti iaid kjat ka ban poi sha surok national highway, kaba ju pyndonkam ki paidbah naduh hyndai kaba don kumba 4 kilo mitar kaba hap rung lyngba na jan ka company bad kane ka lynti ka dei kaba poi beit ha shnong, hynrei ka company mynta ka la khang noh ïa kane ka lynti da kaba shna da ka kynroh bad kane ka la buh jingeh mynta ïa ki paid bah ha ka leit ka wan.Kumta ha kaba iadei bad kane la kyrpad ïa ka company ba kan weng noh ïa ka jingkah kynroh ïa ka lynti iaid kjat ki paidbah.
Shuh shuh, katkum ka jingiathuh u ma P.Pdang, la ong ba mynta ki nongshong shnong jong ka shnong Umlaper, ki hap ban iaid lyngba na phyllaw jong ka company Amrit Cement ban poi sha shnong namar ka lynti kaba kham jan ïa ki ban iaid ka la shah khang da ka kynroh.
Halor kane ka shnong ka la ai por ïa ka company shi taiew kata naduh katei ka 18 tarik bad mynta ki dang ai por biang haduh ka sngi saitjain bad lada ka company kam leh eiei ki nongshong shnong kin mih paidbah ban pynpra hi ïa ka kynroh.
Kumjuh ruh ha ka shithi, u Chaiman ka shnong Umlaper, u la pynpaw ka jingsngew khia ïa ka rukom pynieng ïa ki post electrict bad buh ïa ki tiar electrict kiba pynpoi bor ding shapoh shnong, halor kane ka shnong ka kyrpad ïa ka company ba kan leh noh da kumwei khnang ba kan nym buh jingma ïa ki paidbah kiba iaid lyngba na ka jaka ba buh ïa ki tiar electrict bad ba pynieng ïa ki post namar kane ka ju wanrah ruh ïa ka jingsngew tieng sngew syier ha ki paidbah.
Kum ka jingpyntip, ïa ka shithi la phah copy ruh sha u Deputy Commissioner East Jaiñtia Hills District, sha u Superintendent of Police East Jaiñtia Hills District bad sha u Doloi jong ka elaka Rymbai.