Shillong, Iaiong 2 : Ka jingbym hun ïa ka soskular ( Memorandum of Understanding (MoU) pynbeit pud ba la ïasoi da u Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma ha khmat u Myntri Kam Pohiing ka ri u Amit Shah ha ka 29 tarik u Lber 2022 ka la nang jur nang jur khamtam hadien ba la mih ka list jong ki shnong bad jaka ba la pynngat sha ka Assam. Mynta ka sngi sa ki bor synshar jong ki lai tylli ki Hima, ka Hima Mylliem, Hima Jirang bad Hima Nongspung ki la byrngem ban kiew ïing lieh ïing saw kata shaduh ïing bishar Supreme Court (SC) lada jia ba ka sorkar kam bishar bniah biang ïa ka soskular ba la ïasoi.
Kine ki himai ki la shim ïa ka rai mynta ka sngi bad ha kaba nyngkong kin ai shwa da ka jingthoh sha u Myntri Rangbah ka jylla ban bishar bniah biang ïa ka MoU bad lada jia ba u Myntri Rangbah bad ka Kynhun Myntri jongu ki sngap jar bad ïaid beit shakhmat kine ki Hima kim banse ban kiew sha ka ïing bishar SC. ïa kane ka rai ki la shim ha ka jingïakynduh lang ki bor synshar na ki lai hima mynta ka sngi ha ka Dorbar u Syiem Raid Marwet ha Baridua, Ri Bhoi.
Kine ki bor synshar jong kine ki lai Hima ki la pynpaw shai ba kim hun satia ïa kane ka rai ba la shim da ka sorkar ban ai ïa ki jaka sha Assam khlem da kynjoh ktien shwa na ki trai jaka puta bad ki nongshong shnong ha khappud shwa ban ïasoi ïa kane ka MoU.
Ha kane ka jingïalang la don lang u Syiem ka Hima Jirang u paiem R.H Wahlang, Secretary ka Hima Nongspung E. Mawlong, Basan Nongkseh jongka Hima Mylliem u Nathaniel Thangkhiew, Syiem ka Raid Marwet paiem Ken Syiem, u nongïasaid aiñ u bah Erwin Sutnga bad I.S Teron u Chief Adviser ka Amri Karbi National Council Desh Demoria bad ki Rangbah Shnong jong ki hynniew tylli ki shnong lem bad ki seng bhalang bapher bapher.
