Shillong, Ïaïong, 28: Da ki spah ngut ki Pulit ki la rung sha phyllaw jong ka skulbah NEHU ha ka Lah Sngi u Blei hadien ba ka Sorkar Jylla dangshen ka la kular ban phah ïa ki bor pahara na ka bynta ka jingshngaiñ jong ki nonghikai, ki nongtrei bad ki samla pule hadien ka jingshah shoh pynmynsaw bad shah byrngem jong u Assistant Professor Alok Singh uba hikai ha ka Deparment of Hindi ha skulbah NEHU, Shillong Campus ha ka 24 tarik mynta u bnai.
Ki samla pule kiba la ïohi ïa ka jingbun jong ki Pulit ka jylla bad ki Pulit CRPF ha Phyllaw jong ka Campus naduh ka por janmiet ki la her syrngiew bad ong ruh ha ka jaka ba kin ïoh jingshngaiñ hynrei ki sheptieng pynban.
Kane ka jingrung jong ki Pulit ha phyllaw jong ka skulbah NEHU ka la pynmih ruh ïa ka jingïapyni nia hapdeng ki nongïalam ka NEHUSU bad u Magistrate hadien ba ki samla pule ki la ïalum hakhmat ka Gate-2 jong ka NEHU bad dawa ba ki Pulit kim dei satia ban rung shapoh ka phyllaw jong ka skulbah hynrei ki dei ban ap pahara sha surok.
Katto katne ki samla pule kynthei ha ka jingïakren bad u nonglum khubor ki la ïathuh ba mynstep ki la don ki Pulit kiba khlem phone Uniform ki la shu patrong ïa ki katto katne ki samla katba na ka Canteen kaba don hapoh ka Campus bad hadien kane la pyllait noh ïa ki ynda la poi ha ka Gate-5.
Kat haduh ba la thoh ïa kane ka khubor tad haduh ka por 9 baje mynmiet ki Pulit ki dang don beit ha phyllaw jong ka skulbah NEHU wat hadien ka jingpyrshah kaba jur na ki samla pule.
Ka jingpyrshah jong ki samla pule ka long namarba ka jingdon da ki spah ngut ki Pulit bad ki CRPF ka la pynher syrngiew bad ka la ktah ruh haduh katta katta ïa ka jingmut jingpyrkhat jong ki samla pule.
Ki samla pule ki la pynpaw ba kin sangeh noh ka jingleit klas tad haduh ban da weng noh ïa ki bor Pulit bad ki CRPF na ka skulbah NEHU.
