Shillong, Naitung, 13: Ki nonghikai skul SSA ha ka sngi Balang ki la byrngem ban pynlong da ka jingïakhih kaba tyngeh halor ka jingbym ïoh tulop la san bnai kynthih, kata, naduh u bnai Rymphang haduh u Jylliew, 2022.
U General Secretary jong ka All Meghalaya SSA School Teachers Association (AMSSASTA) u Bah Defender S. Lamare ha ka jingïakren bad ki lad pathai khubor u la ïathuh ba ka Seng ka ladep phah da ka jingthoh sha u Myntri Rangbah ka Jylla u Conrad Kongkal Sangma uba bat ruh ïa ka tnat Pla Tyngka ka Sorkar Jylla ban siew noh ïa ka tulop jong ki 12,451 hajar ngut ki nonghikai skul SSA hapoh ka 12 tarik mynta u bnai.
Dang shen ki nongïalam ka Seng ki la kynduh ïa u Myntri ka tnat Pule Puthi u Bah Lahkmen Rymbui ban aiti da ka jingthoh ba ka Sorkar kan pyllait noh ïa ka tulop kaba la sahteng la san bnai kynthih bad ïa ka kopi jong ka dorkhas ka seng ka la aiti ruh sha u State Project Director ka SEMAM u Ambrose Ch. Marak.
Ha ka dorkhas ba la aiti sha u Myntri Rangbah ka Jylla, ka seng la maham ruh ba lada ka Sorkar kam pyllait ïa ka tulop kaba san bnai hadien ka jingaipor kaba khatduh, ki nonghikai skul SSA na rilum Khasi, Jaiñtia bad na rilum Garo kiba don hapoh ka shatri jong ka All Garo Hills SSA School Teachers’ Association (AGHSSASTA) kim banse ban pynlong noh da ka jingïakhih kaba khlem pud sngi naduh ka 15 tarik mynta u bnai Parking Lot ka Additional Secretariat, Shillong.
