Nongpoh, Naitung 20 : Ka seng HNYF Northern Region ka la byrngem syndon ban khang tala ïa ka ophis treikam jong ka tnad MeECL ha Nongpoh, lada katei ka tnad treikam kam lah ban pynbiang thikna ïa ka bording ilektrik sha ki paidbah ka thaisha ki paidbah ka thaiñ Nongpoh ha Ri Bhoi District.
Kane ka jingbyrngem ka seng ban khang tala noh ïa katei ka ophis treikam, ka dei hadien ba ka tnad MeECL kam shym la lah satia ban pynbiang thikna ïa ka bording ilektrik kumba donkam ki paidbadh bad bun ruh ki paidbah ki la wan ud wan nam sha ka seng halor ka jingshah ktah na ka jingthud palat ka bording ilektrik.
Halor kine ki jingeh ki paidbah, ka seng HNYF Northern Region ha ka jingïalam u Assistant Secretary, u Bah Donroy Kshiar, bad da ka jingdon lang u Bah Shiningstar Suting President HNYF Arphew-mer circle, u Bah Vincent Sylliang, Secretary HNYF Arphew-mer circle, u Bah Paul Wahlang dkhot ka HNYF Northern Region bad u bah Presious Manner dkhot jong ka HNYF Umling Unit ki la leit ban ïa kynduh mynta ka sngi ïa u SDO bad kumjuh ruh ïa u EE katei ka tnad treikam ban ïa kren halor kane kajingshah ktah ki paidbah.
Haba kren hadien ka jingwan kynduh ïa kitei ki ophisar, u Bah Donroy Kshiar, Assistant Secretary ka HNYF Northern Region, u la ong ba ka seng ka la dawa ba ki dei ban shim khia ban pynthikna ba ka bording kam dei ban dang thud sha ki shnong ba hap ha ka thaiñ Nongpoh bad lada kane ka jingthud ka bording ka dang bteng kum ka seng kam banse wat ban leit khang tala noh ïa ka ophis treikam, namar kam don jingmut ba ki paidbah kin siew tang ïa ka bai bording bad katba ïa ka bording ilektrik pat kim ju ioh thikna ba la shah ktah ki paidbah ha baroh ki liang, bynrap u Bah Donroy Kshiar.
