Byrngem khang tala ka FKJGP ïa ka Sub Centre ha Umjaraiñ, ai por ar taïew

Mawkyrwat, Ïaïong, 17: Namar ka jingbymlah jong ka tnat ka Koit ka Khiah ka Sorkar Jylla ban thungkam pura ïa ki trai jaka katkum ka jingïateh soskular kiba la ai jaka ban shna ïa ka Sub Centre ha ka shnong Umjaraiñ, ka Federation of Khasi Jaiñtia & Garo People (FKJGP) South West Khasi Hills District hapoh ka jingïalam u President Bah Kenesjune Lyngdoh Nonglait ryngkat ka jingsynran lang jong ki trai jaka ha ka sngi Palei ki la ban ïakynduh ïa u Deputy Commissioner jong ka South West Khasi Hills District Bah B. Mawlong ba un tuklar lem.
Ka jingleit ïakynduh jong ki nongïalam ka FKJGP ïa u Deputy Commissioner ka long hadien ka jingïoh jingujor na ki trai khyndew ba ka tnat ka Koit ka Khiah jong ka Sorkar Jylla kam shym la bat ïa ka jingkular katkum ka jingïasoi ïa ka soskular bad ki trai jaka kiba la ai sngewbha ïa ka jaka naduh u snem 2010 na ka bynta ban tei ïa ka Sub – Centre hapoh ka shnong Umjarain, South West Khasi Hills District.
U Bah Kenesjune haba kren ha ki lad pathai khubor, ula ong ka jingleit ïakynduh ïa u Deputy Commissioner ka long hadien ka jingbishar bniah ïa ki kot ki sla bad ha kaba ki la lap ba ka Kong Shidalin Lyngkhoi kaba dei ka trai jaka ka donhok ban dawa katkum ka soskukar ba ladep ïateh.
“Naduh u snem 2012 haduh mynta ka kong Shidalin Lyngkhoi ka dang trei tang kum ka Casual bad kam pat ïoh ïa ka post lajong”, ïathuh u Bah Kenesjune.
Kumta, khnang ba ka jingïateh soskular kan urlong, ka FKJGP ha ryngkat ka jingdonlang ki trai jaka ha ka sngi Palei ki la buh da ka jingkyrpad ïa u Deputy Commissioner, ba un tuklar bad shimkhia lem ïa kane ka kam.
“Lada ki jingdawa kim urlong hapoh artaïew bad lada ki kam kim urlong ka seng kam banse ban khang tala noh ïa ka Sub – Centre ha Umjaraiñ,” la maham u Bah Kenesjune.