Byrngem ka Save Hynñiewtrep Mission ban pyrshah lada rejister case ka CBI ha West Karbi Anglong

Shillong, Naiwieng, 26: Ki san tylli ki sengbhalang kiba kynthup ïa ka Hynñiewtrep Youth Council (HYC), ka East Jaiñtia National Council (EJNC), ka Jaiñtia Students Movement (JSM), ka Hynñiewtrep Achik National Movement (HANM) bad ka Confederation of Ri Bhoi People (CoRP) kiba don hapoh ka lama jong ka Save Hynñiewtrep Mission (SHM) ha ka sngi Saitjaiñ ki la byrngem ban pyrshah beit la ka long ha kano kano ka dur ruh lada jia ba ka Central Burea of Investigation (CBI) ka register case halor ka jingshah siat ïap ki san ngut ki nongshong shnong ka shnong Mukroh, West Jaiñtia Hills sha West Karbi Anglong District, Assam.
Kum ban shu pynkynmaw hangne, hynriew ngut ki briew, san ngut na ka shnong Mukroh bad uwei na ka Jylla Assam ki la duh ei ïa ka jingim ha ka jingsynreit kuli jong ki Pulit bad ki nongpaha khlaw ka Jylla Assam ha ka step 22 tarik mynta u bnai ha ka shnong Mukroh.
Dang shen u Myntri ka tnat Kam Pohing ka Ri u Amit Shah u la kular ban phah tohkit ha ka CBI halor kane ka jingjia hadie ka jingkyrpad jong ka Sorkar Meghalaya bad ka Sorkar Assam.
“Ka daw tynrai jong kane ka jingjia (shah siat ïap ki san ngut ha Mukroh) ka dei na ka jingïakajia pud. Ka jingkylli ïa u Conrad Sangma ka long, lada ka CBI ka wan bad ka regjister ïa ka case ha West Karbi Anglong kan jia aiu ïa ka shnong Mukroh? La bakla lut nadong shadong. Ka Save Hynñiewtrep Mission (SHM) ka kren da kaba shai, lada jia ïa kane ka case yn rejistar bad yn bishar ha West Karbi Anglong, daleilei ruh em ngin ym shah horkit hordang,” ong u President ka HYC u Bah Robert June Kharjahrin haba kren ha ka jingïalang balyngkot shwa ba ki san tylli ki Sengbhalang kin wiang ding ïa ki dur tyngshop jong u Myntri ka tnat Kam Pohing u Amit Shah, u Myntri Rangbah ka Assam u Himanta Biswa Sarma bad u Myntr Rangbah ka Meghalaya u Conrad Sangma ha ka sngi Saitjaiñ.
“Ngin pynthikna ba ïa ka case dei ban regjister ha Meghalaya bad ban tian bishar ha West Jaiñtia Hills da ka CBI Court kaba dei ka District and Session Judge jong ka West Jaiñtia Hills hynrei lym kumta ngin duh wat ïa ka shnong Mukroh sha ka jylla Assam,” u la ong.
“Ngi dawa mardor ïa ka Sorkar Meghalaya kumba ki la kular ban pynbeit noh ïa u pud u sam ha ka wat kaba ar ka dei ban pynbeit noh mynta kaba dang don ka por, namarba kan poi ka por ba lada kwah ban ïapynbeit noh ruh phim don bor shuh. Ngin ai ka jingkyrshan bapura ban ïa pynbeit katkum ki hok ki sot bad katkum ki dulir bad ki Map. U Waheh Shnong ka shnong Mukroh u biang lut ki kot ki sla bad ngi kwah ban ïohi ba ka snam jong ki san ngut ba ki la phlei kan ym sepei da leilei ruh em bad ka hok kan ieng sarong bad ka shnong Mukroh shi jingim kan ïaineh ha ka Jylla Meghalaya,” la dawa u Bah Kharjahrin ha ka kyrteng ka Save Hynñiewtrep Mission (SHM).
U la ong ba ka jingjia ha ka shnong Mukroh kam dei shuh ka jingjia ha ka sien banyngkong bad ka la jia teng ha u snem 2002. “Ka la don ka jingshah siat jong ki briew jong ngi ha kato ka thaiñ bad ha Langpih ha u snem 2010 bad la jan ha baroh kawei ka thaiñ khapppud kiba don hapdeng ka jingïakajia pud,” u la ong shuh shuh.
“Ka jinglong jingman ha ki shnong khapppud ïa mynta ka long kaba sniew haduh katta katta. Lada kim phah mynta ban ïada hynrei kin (Pulit) leit ynda la ïap bad shah pynmynsaw ki briew jong ngi, mano ban kitkhlieh,” u la ong shuh shuh.
U la ong shuh shuh ba ka Sorkar Meghalaya ka dei ban pynthikna ba ki samla Khasi kiba trei bad kiba pule ha Assam kim dei satia ban shah pyndik. “Lada jia eiei ngim banse ban ïaleh ka bniat namar ka bniat bad ka khmat namar ka khmat. Kane kam dei ka thma hapdeng ki Khasi bad ki Assamese lane ki Khasi bad ki Karbi hynrei ka dei hapdeng ka Sorkar India, ka Sorkar Meghalaya bad ka Sorkar Assam,” la ong shuh shuh u Bah Kharjahrin.
“Lada ki sengbhalang bad ki paidbah ka jylla Assam ki tam pud, ngi ruh ngim banse ban tam ïa u laiñ,” u la maham bad bynrap, “kane ka jingjia ka dei ka ishu ïakajia pud bad ka Sorkar ka dei ban ïapynbeit noh mardor hynrei ym dei ban ïapynpoi sha ka jingïasngew pher jaitbynriew.”
U la ong ba ka Save Hynñiewtrep Mission ka phah ïa u kyrwoh uba shai sha ka Sorkar MDA bad sha ki 36 ngut ki MLA Khasi-Pnar ban ïa pynbeit noh ïa u pud u sam katba dang don ka por.
“Mynta ngi dang wan (pynlong jingïakhih) tang hakhmat ka iingsah u Myntri Rangbah hynrei lada bakla ngim banse ban leit pynlong ïa ka jingïakhih hakhmat ka ingsah jong ki 36 ngut ki MLA Khasi Pnar bad ban thang ïa ki tyngshop hakhmat ka ingsah jong ki lada kim shimkhia ban pynbeit ïa u pud u sam,” la maham une u Nongïalam ka HYC.
“Phi lah ban pynap Pulit ha ki katto katne ki jaka, phi lah ban khang ïa ka internet, hynrei lada ka don ka jingkhih bitar buk ha baroh kawei ka Bri u Hynñiewtrep hato phin leh aiu? Sngewbha ynnai tynjuh palat ïa ka jingïaishah jong ki samla bad jong ngi ki sengbhalang. Kan poi ka por ba lada ngim lah shuh ban tehlakam ïa ki samla bad wat ïa lade kata ka dei ka jingma kaba ap. Ko Bah Prestone Tynsong, ïalam ma phi shakhmat ban pynthikna ba ka jingïapynbeit ïa u pud u sam ha ka wat kaba ar ka dei ban sdang noh bad ngi kyntu ïa ka Sorkar India ba ka dei ban tuklar mardor bad u Amit Shah u dei ban pynthikna ba ka jingïapynbeit pud ka dei ban jia noh shwa ka elekshon,” la bynrap u Bah Kharjahrin.
U la ong ruh ba ki san ngut kiba la duhei ïa ka la jingim bad ki arngut kiba la mynsaw bad kiba don hapdeng ka jingshah sumar ha NEIGRIHMS Hospital ki dei ban ïoh ïa ka hok.