Shillong, Nailur 19: Ki nongïalam shnong jong ka shnong Mawïongrim, Shillong ryngkat lang bad u nongwad RTI u Bah Disparsing Rani ha ka sngi Nyngkong ki la kyrpad ïa ka tnad PHE bad ïa ka tnat Animal Husbandary and Veterinary ba ki dei ban shimkhia halor ka jingtuid ka um jaboh na ka jaka shohdoh bad na ka jaka pynmih dud sha ka Wah Umshing kaba tuid lyngba ka shnong mawiong kaba long ruh ka tyllong umbam jong kane ka shnong bad lada kim lah ban leh ïa kane na ka liang ka shnong ka lah ban ujor noh sha ka National Green Tribunal (NGT) ba kan tuklar ïa kane.
Ha ka jingïakren bad ki lad pathai khubor u Rangbah Shnong jong ka shnong Mawiongrim u Bah Sorbar Lyngdoh Nongpyiur u la ïathuh ba ka shnong Mawiongrim bad ka shnong Mawiong Umjapung ki dei ki shnong kiba pyndonkam ïa ka umbam umdih, ka um saitjain na ka tyllong jong ka Wah Umshing bad lada ka jingtuid jong ka um jaboh sha kane ka wah kan buh jingma ïa ki nongshong shnong kiba pyndonkam ïa ka um bad ha kajuh ka por u la ong ruh lada ka tnad Animal Husbandary and Veterinary kim shimkhia ban set noh ïa ka jingpyntuid um jaboh na ka jaka otdoh bad pynmih dud, ka shnong kam banse kan ujor sha ka National Green Tribunal.
Haba jubab lano kin leit ban ujor sha ka NGT na ka liang u Rangbah Shnong u la ong ïa kane yn sa rai ynda la dep ban lum ïa ka dorbar shnong.
U la ong ruh namar ka jingbym biang ka umbam bad ka jingduh ba khah khah ka Pump ban pynpoi um sha shnong kiba bun na ki nonsghiong shnong ki hap beit ban shaniah ban ïoh umbam umdih bad um sait um khlieng na ka wah Umshing bad lada kane ka jingpyntuid jaboh na kine ki ar tylli kin jaka ka lah ban buh jingma wat ïa ka koit ka khiah ki nongbam um namar ki jaboh ba mih na kine ki jaka ki dei kiba la khleh bad ki kynja dawai u la ong.
Shuh shuh u Bah Sorbar u la kyntu ïa ka tnat PHE ba ka dei ban shimkhia halor ka jingsniew jong ka Pump-um manla ka por kat haduh ba ka pynlong ïa ka shnong ka thaw ban mad ïa ka jingkyrduh kaba shyrkhei ha kaba ki nongshong shnong ki hap ban shu thied ïa ka um manla ka por.
Haba bynrap lang ïa kane u Bah Dispar u la ïathuh ba na ka liang jong u u la wad ruh da ka RTI ban lap ïa kane ka jingtuid ki jaboh bad ki jingujor kiba ka PHE ka la ai pyrshah ka jingpyntuid jaboh na ka jaka shohdoh bad ka jaka pynlang dud na ka liang ka PHE ka la dep ai jingujor.
U la ong ruh ba kat kum ka aiñ ka dei ka tnat PHE ba dei ka nongïada bad ka nongri nongsumar ïa ki tyllong um bad ka don ka iktiar ban ai kino kino ki jingpynshitom ïa kiba pynjot ïa ki tyllong um bad ki wah.
