Byrngem ka longkmie ba kam trai khyndew ban phah mih noh ïa ki paitbah jong ki san shnong
![](https://mawphor.com/wp-content/uploads/2022/07/mawphor-1.jpg)
Nongstoiñ, Nailar, 13: Kawei ka longkmie kaba la tip kum ka kong Streamilda Syiemlieh na ka shnong Langja ryngkat bad ka kynhun jong ka, ki la kynnoh ba ki paitbah shong kiba shong ha katei ka thaiñ kata naduh Ktiehthawïar, Khyllem-sangrin, Umthlu, Langja bad Mawri kiba hap ha ka hima Jyrngam Sirdarship, ki la shu shong beaiñ bad ki rep ki riang, ki thung ki tep, ki trei ki ktah khlem da pan jingbit na ka kaba dei ka trai khyndew bad ka la byrngem da kaba tyngeh ban phah mih noh ïa ki nongshong shnong na baroh san tylli ki shnong.
U bah Beswell Khar-syiemlieh sordar shnong Langja bad u bah Likshon Syiem na ka shnong Mawri, haba pyntip ha u nongthoh khubor ki la ong ba la bunsien bun wat, ki rangbah bad ki samla ki la pyrshang ban ïasyllok ïa ka ba kan wan noh sha ka miej jong ka jingïasngewthuh jingmut. Hynrei katei ka longkmie kam pynsngap satia bad ka nang pyneh beit triang da kaba kam trai lut ïa ki kper ki phrah, ki jaka ki puta baroh katba ïohi ka khmat.
Ktei ki rangbah ki la ong ruh ba kaba phylla ka long ba katei ka longkmie bad katto katne ki longïing kiba kyrshan ïa ka, kim treh satia wat ban phah shon dur thep vote lane Electoral Photo Identity Card. Nalor kata haba ka shnong ka thmu ban pyntrei ïa ki kam pynroi kum ki surok, ki lynti ïaid kjat kiba la mang pisa na ka MNREGS, kam shah satia lada ka dorbar shnong kam ïaid lyngba na ka.
Ki la ong ruh ba katei ka longkmie kam ju kheiñ snep wat ïa ki majistor bad ki ophisar sorkar haba khot ha ophis ïa baroh arliang mamla, ban pynïasuk ne ban ïapynbeit na ka bynta ka jingbha jong ka shnong ka thaw bad ka imlang sahlang. Kam ju pynsngap satia hynrei ka pynksan ïa la ka jong ka nia kat haduh ba wat ki majistor ruh ki hap ban shu sngap bad kim lah ban leh ei ei.
La ong ruh ba ha kine ki snem na ka liang ki paitbah ki la bitar lep ïa ka jingleh meng jong katei ka longkmie, namar ba kam shah ban shna ïa ki surok bad ki lynti ïaid kjat bad kiwei kiwei ki bynta kiba la pyntrei lyngba ka skhim MNREGS. Ki paitbah kim shah shuh ïa ka ba kan leit pah kit jingkit da ki kali na ki jaka ba don ki surok ba la shna hi da ki paitbah. Ki la buh da ki khyrdop bad kiba lah ban leit kit jingkit da ki kali kum ïa u sying bad u synsar ki hap ban pyntip lypa ha ki samla shnong bad ki rangbah khnang ba kin tip ba ki dei ki mar rep jongno.
Kitei ki rangbah ki la kyntu ïa u bah Nasar Syiem Jahnoh Sirdar ka hima Jyrngam, ba u dei ban leh ei ei halor katei ka kam bad ba un kren ei ei ïa katei ka longkmie, khnang ba kan ym don shuh ka jingïapeit khat ha shnong ha thaw lane ka jingïakynad, namar 99 % na ki paitbah jong ki san tylli ki shnong ki la kwah bad thrang dik dik ban don noh ka jingïalong kawei. Ki la kyntu ruh ïa ki bor sorkar ba kim dei ban shu pyndem tdong ha kawei ka briew, hynrei ki dei ban sngap ïa ka sur jong u paitbah.