Byrngem ka KSU ban pynkhih biang da ka Anti-Foreigners’ Movement pyrshah ïa ki mynder

Shillong, Naitung, 07: Ka Khasi Students Union (KSU) ha ka sngi Thohdieng ka la byrngem ban pynkhih biang da ka Anti-Foreigners’ Movement lada ki nongïalam jong kiwei ki jaidbynriew bar jylla kiba sah ha kane ka jylla kim lah ban tehlakam ïa la ki jong ki briew.
“Kine ki jingjia kiba khah khah ki la pynkynmaw ïa ka KSU ïa ki por kiba la leit kum ha ki phew snem 70, 80 bad 90 ha kaba ki dkhar ki thom naphang ïa ki Khasi da ka jingthmu ba pynlong ïa ki Khasi ban phetwir noh na Shillong. Ka KSU ka bthah ïa ki nongïalam jaidbynriew jong ki dkhar bapher bapher ba ki dei ban tehlakam ïa ki briew jong ki, lym kumta ka KSU kam banse ban shim biang da ki sienjam kumba ki nongïalam ka seng ki la shim ha kito ki por kum ka Anti-Foreigners’ Movement. Lada ka seng ka hap ban shim ïa kita ki sienjam, kine ki jaidbynriew lem bad ka Sorkar kin hap ban bah khlieh lada jia eiei kaba sngewsih,” la maham u General Secretary ka KSU u Samla Donald V. Thabah ha u kyrwoh ba la phah sha ki lad pathai khubor.
“Ka KSU ka kwah ban pynkynmaw ïa ki parari halor ki jingjia kiba man ka por ha kaba ki mynder ki ju thombor ïa ki Khasi khlem kano kano ka daw,” u la ong.
“Dang ha u 2020, ki mynder Bengali ki la pynïap dusmon ïa u Bah Lurshai Hynñiewta ha Pyntha Umdan kaba la pynsmiej ïa baroh ki paidbah Khasi kiba sah sha kito ki thaiñ. Ha u 2021 ter ter, ki mynder ki la pynïap dusmon ïa u Phershanroy Myrthong ha Golf Links bad ki la bom ïap ïa u Elias L Nonglait ha Them Bijoy. Ki la bun ruh ki jingshah shoh ki Khasi kum ha Nongmensong, ha Rilbong, ha 4th Furlong bad shawei shawei. Dang shen ar ngut ki samla Khasi kiba dang kamai jakpoh ha Khyndailad ki la shah bom shah tied da ki tiar pynmynsaw ha ki dkhar ba la shongshit khawiang,” ong u kyrwoh.
“Ka KSU ka la ïoh jingtip ruh ba mynnin ka miet (Sngi Palei) ka huri hura ha Laitumkhrah ka mih namar ka jingjrong kti khlem daw jong ki dkhar ïa ki khynnah Khasi. Kaba sngewphylla ka long haba ki CRPF ki la wan, ki ai jingïada pynban ïa kine ki dkhar bad tied lathi naphang ïa ki Khasi. Halor kane ka jingjia mynnin (sngi Palei), ka seng ka dang ïai lum shuh ki jingtip ban ïoh ïa ka jingshisha kaba la poi haduh uto u pud,” ong u General Secretary ka KSU halor ka jingjia ha ka Laitumkhrah ha ka miet sngi Palei.
“Ka KSU ka kyntu ruh ïa baroh ki para Khasi ban long kiba la khreh namar kane ka jingleh ki dkhar ka dei ka buit ban pyntreikam ïa ki jingthmu ki jong ki, kiba ki la pun naduh ki por mynshwa,” u la bynrap.