Byrngem ka AHAM ban mudui sha Iingbishar ba shah thung kam tang uwei u Garo ha MSWWDA

Shillong, Jylliew, 11: Ka A·chik Holistic Awakening Movement (AHAM)-Central Executive Board ha ka sngi Saitjaiñ ka la phah da ka jingthoh sha u myntri Rangbah ka Jylla u Conrad K Sangma ban pyrshah halor ka jingïoh rung kam tang uwei u jaidbynriew Garo ha ka post Field Engineeer ha ka ophis jong ka Meghalaya State Watershed and Wasteland Development Agency, ka Sorkar Jylla.
Ha ka dorkhas ka AHAM ka la pynpaw ïa ka jingpyrshah halor kane ka jingpynmih ïa ka result da ka Meghalaya State Watershed and Wasteland Development Agency bad kam ruh ba kane ka dei ka jingkyntait ban pyntreikam ka bhah thungkam bad ka jingbym kwah jong ka Sorkar Jylla ban theh ïa ki kam pynroi hapoh rilum Garo.
“Ha ka kyrteng jong ki jaidbynriew A`chik jong ka jylla ngi kwah ban pyntip ba ka resol jong ka personal ba la pynbna da ka Meghalaya State Watershed and Wasteland Development Agency (MSWWDA), ka Sorkar Meghalaya ka dei ka jingleh bym suidñiew ïa ka bhah thungkam ha kaba ïadei bad ka jingpynbna ïa ka resol na ka bynta ka post Field Engineeer,” ong u President ka Seng u George Prince Momin.
“Lah ban kdew ba na ki 16 ngut ki nongthep kam kiba la shah khot sha ka personal interview ha ka post Field Engineer jong ka Agency, tang uwei u A·chik u la shah jied bad kane ka dei ka jingkyntait ban pyntreikam ïa ka bha thungkam,” la kynnoh ka Seng.
U la ong ba bun na ki projek kiba la pyntreikam ha ki shnong ki thaw bad namarkata la donkam ban pyndap ïa ki post kiba thylli da ki trai jylla khnang ba ki projek kin long kiba seisoh da ka jingïatreilang jong ki paidbah nongshong shong bad tang ki trai shnong ki dei kiba tip kham bha ïa ka jinglong jingman jong ka jaka.
“Kane ka jingjia pyrshah ïa ka jaidbynriew Achik ka dei ka jingkyntait lyngba ka jingthep kam kaba pyni ïa ki dak ba ki bor bahalor jong ka Agency hapoh ka Sorkar Jylla kim don mon ban pyntreikam ïa ki projek ha rilum Garo,” ula ong.
Ka Seng ka la dawa ba dei ban pyndam noh mardor ïa ka resol ba ladep pynbna bad dawa ruh ba dei ban pyntreikam ïa ka bhah thungkam.
Ka AHAM ka la dawa ba dei ban thung ïa ka jingtohkit khnang ban lap ïa kiba donkti halor kane ka kam namar ka jingbym pyntreikam ïa ka bhah thungkam.
Kane ka kynhun ka la maham ruh ba lada ki bor pynïaid kim sngap kan mih ka jingïakhih ha rilum Garo. Ka Seng ka la byrngem ruh ban tan sha Ingsishar pyrshah ïa ka Agency lada kim lah ban pyntreikam ïa ka bhah thungkam.