Shillong, Naitung, 01: Ka Federation of All Meghalaya Adhoc Secondary Teacher’s Association (FAMASTA) ha ka sngi Thohdieng ka la byrngem ban mih sha surok ban pynlong da ka jingïakhih lada ka Sorkar kam lah ban shim rai ha kaba ïadei bad ka jingpynkiew tulop ïa ki nonghikai skul Adhoc ha kaba kut jong u bnai Naitung, 2022.
“Ka FAMSATA ka babe ban ïohi ka Sorkar MDA kam shym la shim ïa ka jingkitkhlieh ïa ka jingïam jong ki nonghikai skul Adhoc. Ka Sorkar kaba rim wat hapdeng ki jingeh kiba bun ka la pynkiew ïa ka tulop jong ki nonghikai. Hynrei dei tang ka Sorkar MDA ka bym shym la leh eiei halor ka tulop jong ki nonghikai watla ki (Sorkar) tip shai ïa ka jingrit ka jingïarap Grant kaba ngi ïoh,” ong u kyrwoh ba la phah da u President.
“Ka seng ka la dawa ban kyrtiew kyrdan Deficit Pattern ha u snem 2019 ïa ka Sorkar MDA hynrei na ka daw ka jinghira ka pla pisa ka sorkar ka la tyrwa ban shu pynkiew da ka tulop. Hynrei ka long kaba sngewsih ban ïohi ba ka Sorkar kam shym la leh eiei tad haduh kine ki sngi kat haduh ba ka la ktah ïa ki nonghikai ha ka jylla,”ong u kyrwoh.
Ka jingïalang jong ka FAMASTA Central Body kaba la long ha ka sngi Palei ka la shim ïa ka rai ban ai por haduh kaba kut jong u bnai Naitung, 2022 ba ka Sorkar ka dei ban shim ïa ka rai bad lada ka phiel ban leh kumta ka Seng kan sa shim da kawei pat ka rai kaba tyngeh, la ong u kyrwoh.
