Byrngem ïakhih ka RBCSU lada ym lah bteng ïa ka kam

Nongpoh, Naiwieng 08: U Myntri ka tnad pule puthi u Ma Lakmen Rymbui mynta ka sngi haka jingleit ïuh kjat ha Ri-Bhoi College, u la leit ruh ban jurip ïaka jingtei ïaka Auditorium kaba la shu sah khongreng mynta la bun snem hadien ba ki samla pule jong ka College hapoh ka lama ka Ri-bhoi College Student Union kila pynpaw hakhmat jong u myntri halor ka jingdonkam ban don noh ka Auditorium ha katei ka college naka bynta ka jingdonkam ban pynlong ïaki prokram bapher bapher.
Ha katei ka jingleit jurip la don ryngkat ruh da u Bah SSR Bamon Principal ka Ri Bhoi College, u Samla Jayson Lennox Nongrum President ka RBCSU, u Bah R Kharbihkhiew ADC ka Ri-Bhoi bad ki nonghikai.
Kumba la ioh lum jingtip, ïa katei ka Auditorium la sdang ban shna naduh u snem 2012-13 bad la dep ruh ban mang pisa ruh kumba 4 klur eiei lyngba ka NEC Scheme, hynrei kaba sngew lyngngoh ka long ba haduh mynta la shu pynieng tang ki paia bala sop da ki sañium bad kylla iingjah.
Naka liang u Bah Lakmen Rymbui u la pynpaw ba um don jingtip eiei shaphang katei ka jingtei ïaka Auditorium hynrei ka dei tang lyngba ka jingpyntip jong u President ka Union u Samla Jason Lennox Nongrum bad bthah ïaki bor pynïaid jong ka College bad kumjuh ka Union ban leit ïakynduh ïa u Deputy Commissioner ba yn lah pat ban pyndep ïa ka jingtei ïa katei ka Auditorium lyngba ka District Mineral Fund.
Naka liang u Samla Jayson Lennox Nongrum President ka RBCSU u la ong ba la 38 snem ka Ri Bhoi College kala ai ka jingshakri ban long kum ka shlem hikai kaba dei kawei naki College bala trim tam ha Ri-Bhoi, hynrei sngewsih ban pynpaw ba ka College haduh mynta mynne kam pat lah ban pynbiang ïa ki jingdonkam ba hakhmat bad khamtam ka bha ka miat jong ki samla pule katei ka College.
Ka RBCSU ka kren da kaba shai ba kam kwah ba ka ka jingmyntoi jong ki khynnah pule yn leh Politik da mano re mano, kane ka dei ka hok jong ki samla pule kumno haduh mynta dang hap ban dawa? Bad shaei jah la pisa bala dep mang? Ka Union ka la dep ban rai ba lada ym lah ban sdang biang ïa kane ka kam, kam banse wat ban pynlong da ka jingïakhih ba tyngeh.
Ka Union ka kyntu wat ïa ka Governing Body ban kyrshan ïa ka Union ha kane ka kam ban pynurlong ïa ka jingdawa bad shen kin sa leit ban ïakynduh ïa u Deputy Commissioner ka Ri-Bhoi District katkum ka jingai jingmut jong u Myntri.