Shillong, Jylliew, 24: Ka Meghalaya Medical Services Association (MMSA) ka la byrngem ban pynlong da ki jingïakhih kiba khlem pud sngi kum ka dak ban pyrshah ïa ka jingbym pynshitom jong ka Sorkar Jylla ïa ki bor pynïaid jong ka Indian Institute of Public Health (IIPH).
Ïa kane ka rai la shim ïa ka jingïalang ba kyrkieh jong ka State Executive Committee (SEC) jong ka MMSA kaba la long ha ka sngi Thohdieng.
“Ka SEC jong ka MMSA…ka la rai lada ka Sorkar sngap mynthi ïa ki jingdawa jong ka MMSA ngim don lad shuh da kumwei pat sa tang ban shu pynlong beit da ki jingïakhih ïa kiba ngin sa pyntip,” ong u General Secretary ka MMSA u Dr. R. Pohsnem ha ka shithi ba la phah sha u Secretary in-charge ka tnat ka Koit ka Khiah ka Sorkar Jylla.
Ha ka shithi ba la phah sha u Myntri ka Koit ka Khiah u James PK Sangma ha ka 1 tarik mynta u bnai, ka MMSA ka la dawa ïa ka Sorkar Jylla ban thung da ka jingtohkit bad ban pynshitom pyrshah ïa u Registrar bad ïa u Director jong ka Indian Institute of Public Health (IIPH) halor ka jingkynnoh bym dei ïa u Director of Health Services (MI) u Dr. Aman War ha ki lad pathai khubor.
Ka Seng ka la pynpaw ïa ka jinglyngngoh halor ka jingkynnoh shim rai jong u Principal Secretary ka tnat ka Koit ka Khiah u Sampath Kumar ban shah liang ïa ka IIPH ha ka jaka ban sngap ïa ka jingpynshai jong u DHS (MI) ha ka 27 tarik, Jymmang halor ka jingpyndonkam ïa ka NIFT building barim ha Pasteur Hills, Lawmali.
U President ka MMSA u Dr Y. Phira ha ka shithi u la ong, “ngi la rai ban kyntu ïa phi ba phin thung noh kham kloi da ka jingtohkit pyrshah ïa u Registrar bad ïa u Director jong ka IIPH, Shillong Campus halor ka jingkynnoh bym dei ïa u DHS (MI) ha ki lad pathai khubor, uba la pyndep ïa la kamram katkum ba la bynshet bad ban pynshitom.”
