Jowai, Nailar 08: Ka Dorbar Shnong Umjalisiaw ha ka sngi Palei ka la byrngem ban ‘boycott’ ïa ka elekhson MDC ka ban sa long lada ka Jaiñtia Hills Autonomous District Council (JHADC) kam sngap ïa ka jingdawa jong ka shnong hadien ba la pynngat ïa kane ka shnong sha ka Shiliang Myntang Constituency.
“Lada ka District Council kam pdiang ïa ka jingkyrpad, ka shnong kan ym ïa shim bynta shuh ha ka jingïathep vote ha ka elekshon MDC ka ban sa long,” ong u kyrwoh na u Waheh Shnong u Bah Knerlang Siangshai bad u Secretary u Bah Kyrshan Dkhar bad ïathuh ruh ba ka Dorbar Shnong ka pyrshah jur ïa ka rukom phiah Constituency ha kaba ïadei bad ka shnong Umjalisiaw West Jaiñtia Hills District.
Ka jingïalang jong ka Dorbar Shnong ka la rai ban ai jingtip sha ki bor ba dei peit ïa ka rukom phiah ïa ka MDC Constituency
Ka shnong Umjalisiaw kaba la a ïoh jingtip ba la pynngat sha ka Shilliang Myntang Constituency ka la ieng pyrshah ïa kane halor ka nongrim ba ka shnong kam ïadei lynti shuh bad ka Shilliang Myntang Constituency.
La ïathuh ba ka lynti ban ïaid ruh ka long kaba jngai bha na ka shnong shaduh sha Shilliang Myntang la kumno kumno ka la jlan haduh 60 kilomitar eiei.
Ka shnong ka pyrshah ïa kane jingphiah Constituency namar ka rukom phiah ka long ka bym ïahap shuh da kaba kynnoh ruh ba la i kumba la leh dusmon ïa ka shnong, la ong ki nongïalam shnong.
Ka Dorbar Shnong ka la kyrpad ïa ka District Council ban pynngat ïa ka shnong Umjalisiaw sha ka Constituency kaba marjan kaba dei na kajuh ka surok ban ïaid lynti.
