Byrngem ‘boycott’ Elekshon ki paidbah ka Raid Nongtung lada ym urlong ka jingdawa surok rong

Nongpoh, Nailar 06 : Ki paidbah jong ka Mawlasnai naduh ki sengbhalang, ki longkmie bad ki nongïalam shnong haka jingïaid rally mynta ka sngi na Umpowin sha Mawlasnai kila dawa ba ka sorkar ka dei ban siang rong noh mardor ïa u surok naduh Liarbang sha Mawlasnai ter ter shaduh Thadrang namar ki paidbah kila ngiah shoin ïaka jingeh ba mad man la ka sngi haka leit ka wan khamtam ban beh ïaki kam ki jam bad ka pang ka shitom namar ka jingsniew jong u surok kala long kaba shyrkhei.
Ïa katei ka jingïaid rally la pynlong ruh da ka Hynniewtrep Youth Council, Raid Nongtung Circle hapoh ka jingïalam jong u Samla Hercules Suting kum u President bad u Samla Shemphang Masharing General Secretary ka Raid Nongtung Circle, bala kyrshan lang ruh da ka HANM, HITO, HNYF, ki seng samla naki shnong bapher bapher, ki longkmie, ki nongïalam shnong, ki nongniah kali kamai bad kiwei kiwei ki riew rangbah.
Ka daw bala pynlong ïaka seng HYC ban pynlong ïa katei ka jingïaid paidbah ka dei namar ba kum ka seng kala ngiah shoin halor ka jingeh ba ki paidbah ki mad man ka sngi haka leit ka wan naka jingsniew palat jong u surok naduh na Liarbang ter ter shaduh Mawlasnai, wat la ka seng kala dep ban pynsngew naka por shaka por sha ka sorkar hynrei haduh kane ka khyllipmat ba mynta ka sorkar kam pat lah ban pynurlong ïaka jingphohsniew jong ki paidbah.
Kiba bun ki nongkren kiba la kren ha katei ka sngi naduh ki nongïalam shnong , ki nongïalam sengbhalang kila pynpaw ïaki jingeh ba khraw ba ki ïakynduh man ka sngi haka leit ka wan kaba la don ruh ka jingjia ba sngewsih bala don kawei ka longkmie kaba la khlad noh tang nakadaw ba slem ban poi sha jaka sumar, bad kane baroh ka dei ka jinglehbeiñ bad ka jingshah iehnoh beiñ jong ka sorkar kaba la shu kular thok ïaki paidbah naduh u nongmihkhmat u ba la shu kular kai ban pynbiej ïaki paidbah.
Kila pynpaw ruh ba bun naki khynnah skul ki ju slem ban poi sha ki jaka pule naka daw ka jingsniew palat u surok bad kane ka jingeh ki paidbah kam dei shuh kaba dang thymmai ha kaba kum ki paidbah ki mad jingeh mynta da ki phew snem bad ki nongmihkhmat ki shu peitkai ïaka jingeh ki paidbah.
Namarkata naka liang ki paidbah kila shim ïaka rai ban sangeh thep vote haka elekshon ban wan namar kim kwah shuh ban dang shah pynbiej ha ki nongmihkhmat ba kin shu kular kai bad lehkai ïaka jingeh jong ki paidbah bad ban dang pynjur ruh ki jingiakhih nangne shakhmat ban dawa naka sorkar ba ka dei ban siang rong noh ïa utei u surok.