Nongpoh, Naitung 06: Namar ka jingbym khein snep ka sorkar ïa ki jingdawa bad ïa ka hok bai bylla ki nongtrei ASHA hapoh ka tnad ka koit ka khiah ha ka jylla, ki nongtrei ASHA hapoh ka jylla ki la rai ban mih madan biang ban ïakhih na ka bynta ban dawa ïa ka la hok ba ka sorkar haduh mynta kam shym la pyn-urlong kumba la ju dawa da ki nongtrei ASHA hapoh ka lama ka Meghalaya ASHA Worker Union (MAWU).
`Kane ka jingthmu ki nongtrei ASHA ban mih madan biang na ka bynta ban dawa ïa ka la hok bai bylla ka ka la paw pyrthei mynta ka sngi, hadien ba ki Nongïalam ka Meghalaya ASHA Workers Union ki la pynpaw sha ki lad pathai khubor halor ka nongrim ba ka sorkar ka la leh kyllut bad kwah tang ban pynbiej ïa ki nongtrei ASHA khlem da siew pat ïa ka bainong kaba ki dei ban ioh kumba la mang da ka sorkar.
Haba ïa kren mynta ka sngi sha ki lad pathai Khubor ha Ri Bhoi, ka President ka Meghalaya AHSHA Workers Union, ka Kong Mirajune Myrsing ka la ong ba kum ki nongtrei ASHA ki la ngiah shisha ïa ka jingleh buit tuh bad ka jingleh shukor ka sorkar jylla lyngba ka tnad ka koit ka khiah bad ki nang tang ban phah bylla ne phah trei bad kim siew hok pat wat ïa ka bai bylla ki nongtrei ASHA nalor ba ka jingsiew ka long kaba rit.
Ka la ong ruh kum ka Union ka hap ban kren na ka bynta jong baroh ki nongtrei ASHA hapoh ka jylla ba ka sorkar ka la leh bein ïa ki, ki don ki ASHA kiba ym ioh pdiang ïa ka Fixed Incentive kaba long Rs. 2000 na ka sorkar jylla bad Rs. 2000 na ka sorkar kmie. Kane ka jingleh ka sorkar ka la pynbitar ruh ïa ki nongtrei ASHA ha kaba ki la shu shim ba ki nongtrei ASHA ki dei tang kum ki briew kiba ym don jingim.
Ka la ïathuh ruh na ka liang ka MAWU dang ha ka 4 tarik u Lber 2022 ki la dep ban kynduh ïa u Myntri ka tnad ka koit ka khiah ban ïa kren halor ka jingeh ki nongtrei ASHA ba dei ban pynkhuid noh ïa baroh ki pisas ba dang sah kum ka bai bylla ki nongtrei ASHA bad ha kajuh ka por la ïa kren ruh ba pynkiew noh ïa ka bai bylla na ka Rs. 66 shi sngi sha ka Rs. 300 shi sngi ba la kular ban shim khia da u Myntri ka tnad ka koit ka khiah, hynrei kumba long haduh mynta kine ki jingkular ki la shuh sahkut tang ha ka jingïakren.
Na ka liang ka Kong Mirajune Myrsing kum ka President bad ka Kong Betina Langstieh kum ka treasurer ki la pynpaw ruh ïa ka jingeh jong ki nongtrei ASHA ba ki la shah iehnoh bein shisha ha ka sorkar jylla bad ki la kren ruh ka jingeh ki nongtrei ASHA ha kaba ïa dei bad kata ka online payment ba baroh ki nongtrei ASHA kim don Mobile, ka recharge Mobile, ka jingdawa ban ioh noh da ka appointment ba pura bad kumjuh ruh ki jingkhia jong ka kam ba ka sorkar ka la shu bynshet ïa ki nongtrei ASHA katba ha ka liang ka jingsiew pat ka la shu buh teng khlem da siew dep ba ki nongtrei ASHA ki mad jingeh nalor ba ki ïoh ïa ka jingsiew ka ba rit.
