Nongstoiñ, Lber 30 : Ka kam ri ngap ka dei kaba ai jingmyntoi shibun hynrei ka don pat ka jing duh nong haba ka jingïp khlam ki ngap ka wan jia.Ha kane ka lah sngi u blei ka 30 tarik Lber u bah Klestar Syiem na ka shnong Khliehmawlieh West Khasi hills uba dei uwei na ki nongri ngap ba paw bha haba pyntip ha u nongthohkhubor u la ïathuh ba ha ka por mynstep kataba u dang trei jingtrei ha kpe hajan kawei ka ksing ngap u la ïohi ba ki ngap kiba mih napoh ka ksing haba ki sdang ban her ki hap ha madan.
U la ong ruh ba ynda u la leit peit hajan u la lap ba kat kiba mih ban leit wad jingbam ki don kiba hap mar shu mih ha bar ka ksing , don ruh kiba la her kumba katto katne mitar na ka ksing hynrei ki hap noh ha madan. Haba kylli katno tylli ki ksing kiba shah ktah u la ong ba ki don khyndai tylli ki ksing kiba u pynphai shaphang mihngi bad dei tang ki ngap kiba na kitei ki khyndai tylli ki ksing kiba ïap hynrei kiwei pat ki ksing kiba u pynphai sha kawei pat ka phang kim lei lei bad ki khlem hap uwei ruh.
U bah Syiem u la ong ruh ba man la u snem haba la poi u bnai Lber ki ngap ba u ri ki ju ïap bad haba u la pyrshang ban wad bniah balei ba ki ngap ki ïap khlam haba la poi une u bnai um pat lah satia ban lap ïa ka daw tynrai hynrei u la shu antad ba ka lah ban dei na ka daw jong ka jingpyndon kam dawai ïap ïong jong ki nongrep jhur.
U la ong ruh ba ka pyntha Umyiap kaba don shaphang mihngi na ka shnong jong u kadei ka pyntha rep kaba ki nongrep na ki phew tylli ki shnong ki rep jhur ha katei ka pyntha ha kaba u la shu antad ba ka jingïap khlam ki ngap kalah ban dei namar ba ki leit wad jingbam haduh katei ka pytha. U la ong ruh ba haba ki ngap ki la ïap khlam lada iehnoh ïa ki rew ngap ha ka ksing hadien katto katne sngi lada leit khlong ki sma iwtung bad kim long shuh ba bam.
