Jowai, Risaw 23: Ki paidbah nong pyndonkam da ka Network Jio ha ka shnong Nongtalang kaba hap hapoh ka Amlarem Sub-Division, West Jaiñtia Hills District bad ki shnong ba marjan ki la pynpaw ïa ka jingbynñiaw halor ka jingtlot palat ka Network lyngba u Tower uba don hapoh shnong.
Ki katto katne ngut ki nongshong shnong kiba long ruh ki nong pyndonkam da ka Network Jio ki la ïathuh ba ïa ka Network ki ïoh tang ha ka por mynsngi bad tang shu poi ka por 8:00 baje mynmiet la thikna ban duh Network bad kane ka jingthut jong ka Network ka la kynjoh mynta la ar taïew.
Kaba phylla ka long watla ka jingïoh bording ka biang hynrei u tower Jio u lip. Don pat kiba ong, lehnohei ka jingthep card ba ha ka por ki mut ban pyndonkam ki duh noh ka network.
Uwei na ki nong pyndonkam Network Jio u ong, “ka kamram jong ka kompeni (Network Jio) ka dei ban pynhun ïa ngi ki customers namarba ngi la siew da ka dor bad na kane ka pisa ka kompani ka heh ka san.”
Kine ki nongpyndonkam ïa ka Network Jio ki la kyrpad jur ïa kiba dei khmih ïa u tower uba don ha ka shnong Nongtalang ba kin shna noh khnang ban long ka jingmyntoi ïa ki paidbah bad kumjuh ïa ka kompeni.
