Nongstoiñ, K’lyngkot 04 : Ka surok na Ktiehthawïar shaduh Langpih ka dei ka surok kaba don kam bha namar ka don ka ïew kaba ju long shisien shi taïew man la ka sngi thohdieng bad ka dei ruh ka ïew khappud kaba ki paitbah nong shong shnong jong ka thaiñ ri Muliang kaba kynhup kumba hynriewphewar tylli ki shnong ki kamai kajih, ïadie ïathied ryngkat bad ki nongkhaï na ka jylla Assam.
Nalor kata ki paitbah nong shong shnong katei ka thaiñ ki dei kiba im da ka rep kwai, tympew, ki soh ki pai, synsar , u sying .Kum ban pynkynmaw ba ka jingjngai na Ktiehthawïar haduh Langpih ka long tang khyndai kilomitar bad kumba shi kilomitar ka dei ka surok ba la pyntrei da ka skhim Pradhan Mantri Garamsadak Yojana katba phra kilomitar pat ka dei ka surok kaba la pyntrei da ka sorkar jylla ha u snem 2011 – 12 lyngba ka skhim Special Plan Assistance ha ka por ba ka sorkar Meghalaya Progressive Alliance ka bat ïa kaq bor synshar ha ka jylla bad u (L) Dr .Donkupar Roy u long kum u Myntri Rangbah.
Haba phai sha katei ka surok ka long kaba sngewsih namar naduh ba la shna bad la pyndep ban siangrong ka sorkar ka khlem buh satia ïa ki Musteroll ki ban moramot man la ka sngi haba ki don ki jaka kiba sniew malu mala bad na ka jingbym don ki Musteroll katba nangmih ki snem katei ka surok ka la nang sniew nag sniew haduh ba ka la pra syndon bad jot rathai.
Ha kine ki khyndiat sngi ba la dep ha ka jingleit peit jong u nongthohkhubor jong u Mawphor ïa katei ka thaiñ la lap ba ka surok ka la jot la pra bad ki sañium ki la tap ha baroh arliang ka surok namar ym don ba pynkhuid.Ha katei ka sngi la ïoh ruh ban ïakren bad ki nongñiah kali kamai ba kynthup ïa ki TaTa Sumo bad ki maruti car ha kaba ki la ong ba ha ka por ba ka surok ka dang bha na Langja bad Ktiehthawïar haduh Langpih ka bai kali ka long tan sanphew tyngka hynrei ha kine ki sngi namar ka jing sniew palat ka surok la hap ban pynkiew shispah tyngka uwei u briew .
Kitei ki nongñiah kali kamai ki la ong ruh ba ki lada kim pynkiew ïa ka bai kali ruh kam myntoi namar lada thep katkum ka rukom kata saw ngut hadien iwei shakhmat bad u nongñiah kam long shuh kumta ki hap ban thep tang arngut hadien bad uwei sha khmat.Nalor kata ki la ong ba ka bai kit bai bah ïa ki mar ki mata ruh la hap ban pynkiew bad ka la ktah bha ïa ki paitbah nongthied nongpet nalor ba ki mar ki ata ki la kiew dor lypa.
Na ka liang ki paitbah nong leit ïew leit hat ruh ki la ong ba ka jin sniew jong katei ka surok kam ktah tang ïa ki nongñiah bad ki trai kali hynrei haba don kiba pang ba shitom kiba hap ban kit sha ki jaka sumar kum ha Nonglang PHC, sha Nongstoiñ bad kiwei kiwei ki shem jingeh bha haba ka surok ka sniew namar ha ka jaka ban poi kham kloi ki nongñiah kai ki hap ban pynsuki jai khnag ba u nonpang un ym shitom palat khamtam eh haba kit ïa ki longkmie kiba armet kiba leit ban phah checkup ha Nonglang PHC ka long kaba isynei bha namar ka jingkhohruh khohram jong ka surok.Ki la ong ruh ba ka sorkar ka la dei ban phai khmat lem ban pynbha bad moramot biang ïa katei ka surok khnang ba ki paitbah kin lait na ki jingeh ha ka leit ka wan bad ka kit ka ka bah.
