Nongstoiñ, Ïaiong 16: Ki paidbah nongshong shnong ka thaiñ Mawlieh Rambrai ki la pynpaw ïa ka jingdiaw mynsiem kaba khraw namar ka jingduna ki kam pynroi bad jingsahdien sah shrah jong ka thaiñ Mawlieh baroh kawei kaba hap ha ka thaiñ Rambrai.
Na ka liang ki riew paidbah ki la ud halor ki jingduna haba ïadei bad ka roi ka par jong ki paidbah ka thaiñ ha kiba bun ki liang, kum ki lynti ki syngkieng, ki surok bah ki network mobile bad shibun kiwei kiwei.
Halor kane kajuh ka phang, ka seng Hynñiewtrep Achik National Movement Mawlieh area unit, dang shen ka la leit ban jurip ïa kane ka surok naduh bye pass Mawrusyiar, Syllang, Steplanglur ter ter haduh Mawlieh bad ka jingsniew ka surok ka long kumjuh wat shaduh Rambrai. Ki paidbah ka thaiñ ki mad ïa ki jingeh ha ka leit ka wan ka kit ka bah khamtam ha ka pang ka shitom.
Ka seng ka pynrem jur ïa ki bor ba dei peit namar ka jingleh klet jong ki bor ba dei peit ban maramot noh kham kloi na ka bynta ka bit ka biang jong ki paidbah. Ha kajuh ka por ka dawa ban maramot noh mardor kata ym da kaba shu leh malu mala, hynrei dei ban ai noh beit da ka black topping, namar ym ïohi rong shuh wat tang khyndiat ruh. Ka seng ka kyntu jur ïa ki Nongmih khmat ka thaiñ ruh khamtam u MLA ba u dei ban shimkhia mardor ïa kane ka bynta.
Ha kaba ïadei bad ka network connection ha ka thaiñ baroh kawei, ha ka jingshisha ka dei kaba donkam bha ha kine ki sngi haba ïa dei bad ka suk ka saiñ jong ki paidbah.
Hynrei ka jingshim sting jong kiba dei peit ka pynlong ban ym ïoh network. Ka seng ka la lap ïa ki tower kiba don ha Mawlieh, Mawlarman bad Rambrai ki khlem treikam pura kumba dei ban long na ka bynta ki paidbah nongshong shnong.
