Jowai, Jylliew 23: Ka Jaiñtia Student Union (JSU) Central Body ka la pytnpaw ka jingsngew bynñiaw halor ka Load Shedding bala leh sop sop hapoh ka Jaiñtia Hills District bad ym tip satia na ka ei ka daw ba ka sorkar ka hap ban pynduh bording khlem da ai jingtip shwa sha ki paidbah da kaba shai.
Kane ka jingduh bording kaba khah khah kala wanrah ïa ka jingeh ïa ki paidbah ka thaiñ ha baroh ki liang, namar bunsien ki ong ba ka jinglip bording ka dei barabor na ka jingduna ka um bad mynta pat nalor bala kiew ka um katta ruh ki nongshong shnong ha Ri-Lum Jaiñtia ki dang hap shong khlem ka bording.
Halor kane ka seng ka buh jingkylli ïa ka sorkar ba nalor bym biang ka bording katta ruh ka bai bording ka dang kiew, ka seng ka dawa ïa ka Sorkar lyngba ka tnat MeECL ba kadei ban pynshai halor kane ka phang bad ka sorkar ba kam dei ban shu pynlip bording khlem don kano kano ka daw. Ka seng kala pyntip ba kan ym shong kli kti bad kan ïai buddien ha ka jingïadei bad kane ka mat la pynsngew u President ka seng u samla Jersom Shylla ha ka kyrwoh khubor ba la phah.