Shillong, Jymmang : Na ka liang jong ka Seng FKJGP Mawlai Circle ha u kyrwoh lyngba u President u Khrawkupar Nongsiej ka pynpaw ka jingbym sngewhun bad bynñiaw jur ha ka ba ïadei bad ka jingpyntrei torti jong u kontraktor ïa ka Inter State Bus Terminus (ISBT) ka ba la bei pisa da ka sorkar pdeng.
Ka Seng ka la ong ruh ba ka la sakhi da lade ïa ki kynroh jong ki karma ki ba la orpait lut bad khamtam lei lei ka jingjaw jong ka um ha ki ba bun ki karma ka ba pynishai kdar ba ka don ka jyrsieh ka ba shyrkhei sha lyndet.
Ka Seng ka la ong ruh ba ha ka jingshisha ka long ka jingkyrkhu ka ba khraw ïa ki paidbah ka jylla khamtam ïa ki nongshong shnong jong ka shnong Mawlai ha ba wan kum kine ki projek, hynrei ha kajuh ka por ka long pat ka jingtim lada ka tnat ba dei khmih lane ka Sorkar ka phah pyntrei da ki kontraktor ki bym lah ban trei sani ïa ka kam.
Kumta ruh kane ka jinglong jingman ka wanrah ka jingbitar ïa ka Seng bad khamtam ka jingma pat ïa ki paidbah ki ba shong bad trei ha katei ka jaka. Ka Seng ka la buh jingkylli ruh da ka ba ong; “Mano ban shim jingkitkhlieh lada don ki jingjia ba sngewsih lada jia ba khyllem katei ka kynroh ha ki kamra?.
Kumta ka Seng ka kyntu ia ka sorkar lyngba ka tnat PWD ba ka dei ban shimkhia ban phah pyntrei lane shna biang ïa katei ka jingtei (Building) bad ka dei ban pynshitom ruh kumjuh ïa u kontraktor uba pyntrei torti ïa katei ka kam ïa ka ba ym pat ju ïoh sngew koit ba tang hapoh shi bnai tam hadien ba la plie ïa ka (ISBT) katei ka kamra ka la long haduh katne.
Shuh shuh ka Seng ka pynkynmaw ruh ba kane ka project kadei ka ba la bei pisa da ka Sorkar Pdeng ka ba la kot haduh kumba 48 klur.
