Nongstoiñ, Jylliew, 28: Namar ka jingbym wan trei thikna jong u ophisar ka tnad Veterinary ha ka jaka treikam kaba don ha Rambrai, ki nongïalam ka Hynñiewtrep Integrated Territorial Organisation, ki la hiar sha katei ka jaka ban jurip bad ki la lap ba ha katei ka ophis ym don wat tang uwei u nongtrei ruh.
U bah S.P.Mawlieh nongïalam ba hakhmat jong ka HITO West Khasi Hills District unit haba ïakren bad u nongthoh khubor, u la ong ba ka jingleit jurip jong ki ïa katei ka ophis kaba dei ruh ka jaka ai dawai ïa ki jingri jingdup ka dei hadien ba bun ki nongshong shnong ha ka thaiñ Rambrai kiba dei ki nongri masi, sniang, syiar bad kiwei kiwei, ki la pyntip sha ka seng lyngba ki dkhot bad ki la lap ba ka long thik kumba ki paitbah ki la pynsngew.
Utei u nongïalam ka seng u la ong ruh ba hadien ba ki paitbah nongri jingri ki la pynsngew dalade, ïa ka jingeh kaba ki ïakynduh na ka jingbym don jong u ohpisar u ba dei u Doctor u ba trei ha katei ka jaka sumar ïa ki jingri, ka seng ka la khang tala noh shisyndon bad kan sa leit ban plie ha kano kano ka por lada u Doctor u ba trei ha katei ka jaka u la wan bad u la pyntip sha ki.
Ha kajuh ka por u la ong ba ka seng ka kyntu ïa u Doctor ba um dei ban leh sting ïa ka kam ba la bynshet ha u namar ka pynduh nong bad pynjynjar ïa ki paitbah nongri jingri.
