Bym shimkhia ki nongmihkhmat ïoh pynsah teng ka sorkar ïa ki jingsiew pisa : Bernard

Tura, Iaiong 10 : Ka jingïoh lad ka sorkar ban pynsahteng ïa ki jingsiew pisa ne tulop sha ki Anganwadi, ASHA, nonghikai SSA, ki nongtrei kontrak COVID, ki nonghikai skul, College, ki muster roll, ki nonghikai adhoc bad primary bad kiwei kiwei ki nongtrei sorkar kynthup ïa ki kontraktor ka dei namar ba ka sorkar kam kheiñ snep ïa ki bad khamtam eh ba ki nongmihkhmat paidbah ki leh klet bad leh matlah ïa kine ki jingeh ba kitei kiba la kdew haneng ki ïai ïa kynduh na ka por sha ka por, ong u Bernard N Marak MDC ka BJP na Tura.
“Ki dei kine ki briew kiba la thep vote bad pynjop ïa ki kum ki nongmihkhmat hynrei haba la jop pat kine ki nongïalam paidbah ki shet kylla ïa ki da kaba leh matlah bad leh kyllut beit ïa ki jingeh ba ki mad. Ki khun ki kti jongki ki hap ban pep leit skul bad college namar ki kmie ki kpa kim don pisa ban siew bai skul ïa ki bad don pat kiba hap trei kynta ba kin ïoh ban pynbiang katba lah ïa ki jingdonkam baroh” ong u Bernard.
Don napdeng kine ki nongtrei kiba ïoh tulop na ka sorkar pdeng hynrei kim ïoh kumba la bthah bad buh beit buh ryntih da ka sorkar pdeng. Don pat kiba hap ban ïai ap da ki bnai lynter ba kin ïoh tulop ne ïa kino kino ki jingsiew ba ki dei ban ïoh.
“ Kam shym don ka jingkyntiew kyrdan ïa ki skul bad college hapoh ka jylla mynta la saw snem lynter wat la ka sorkar ka mang pisa bun bha ïa ka tnad ruh.Ka Tura Government College kaba dei ka college kaba rim tam ha ri lum Garo ka donkam ka jingïarap pisa ba kyrpang na ka sorkar ba kan pyndap ïa ki post nonghikai kiba thylli. Ki samla pule ki mad ïa ki jingeh namar kim biang ki kamra klass ban shong bad ki don bun kiwei kiwei ki jingdonkam ba dei ban pynbiang ha ka college” ong u Bernard.
Ka Tura Civil Hospital kaba dei ka hospital kaba ki paid Garo ki phai khmat eh tang sha ka la ki long na kino kino ki district ruh hynrei kam ju don dawai hap ban thied beit na ki pharmacy kiba na shabar. Kumta ka sorkar ka la dei ban shim khia ban pynbiang ïa ki jingdonkam kane ka hospital. Ki skul SSA ki dei ban ïoh ka jingmang pisa kaba biang ban shna ïa ki ïing skul bad nalor kata ïa ka tulop jong ki nonghikai ruh dei ban siew dep man la u bnai, ong u Marak.
U la ong ba ki kontraktor ruh ki dap ram namar ba ka sorkar kam pyllait ïa ki bill jongki. Ha ka jaka ba ka sorkar kan siew dep ïa ki bill jongki, ki ailad pynban ïa ki kompani kiba thymmai ban wan shimti ïa ki kam bad kiba shah khniot ki dei ki kontraktor trai jylla. Kine ki kompani ki ïoh ïa ki kam ba da ki klur tyngka katba ki kontraktor trai jylla ki hap ban mareh na kawei ka jaka sha kawei ka jaka ban leit wad kam. Kane ka jingpynsahteng ïa ki jingsiew ka la dei ka histori ha kane ka jylla Meghalaya.
Kine ki saw snem kiba la leit noh ki la shu long sepei bad mynta u snem u dei u snem uba khatduh ba ki paidbah ki dei ban bishar. Ka long kaba shisha ba ka jylla hi kam shym la kiew ne ïaid shaphrang namar dei tang ki nongmihkhmat bad ki nongbud jongki kiba ïoh jingmyntoi kata ruh na ki skhim sorkar pdeng. Ka pisa ba la ïoh lum khajna la shu pyndonkam bakla bad ki paidbah ki long tang ki nongpeitkai ïa kine ki jingïabam sap jongki. Wat ka pisa ba la sei ha ka por jongka khlam COVID ruh ym pat lah ban siew dep sha kito kiba dei hok ban siew kumba la kular. Kumta ka por ka la dei eh ïa kine ki nongïalam ba kin shim khia ïa ka kam bad khamtam ban thaw lad ban siew dep ïa ki ram ki shah jong kito kiba dei hok ban ïoh na ka sorkar, pynkut u Bernard.