Bym shai bha ka rukom sam bad kheiñ bai bording, leit ïa kynduh AEE ka JSU Syndai Unit
Jowai, Nailur 16: Ka Jaiñtia Students Union (JSU) Syndai Unit hapoh ka jingïalam u President samla Pynshailang Suliang bad katto katne ngut ki dkhot hadien ba la ïoh ïa ka jingujor na ki paid nongshong shnong halor ka jingkhohruh khohram ka jingsam bad kheiñ ïa ka bai bording hapoh ka shnong Syndai. mar mar ki la leit ïa kynduh ïa u Assistance Executive Engineer jong ka MePDCL Amlarem Sub-Division bad buh da ka jong ujor ha ka office trei kam jong u halor ka kynrum kynram jong ka rukom sam bad rukom kheiñ bai bording ki briew jong katei ka ophis.
Ka seng ka pynrem jur ïa ka office treikam jong u AE halor ka jingpynslem jong ki nongtrei ban wan sam ïa ka bai bording bad ka bam por ïa ki haduh hynriew hynñiew bnai ban wan sam sha ki shnong. Kane ka jingleh sting jong ki nongtrei ka buh jingeh shibun ïa u duk u suk u ban siew ïa ka bai bording da ki hajar hajar tyngka shisien siew.
Sa kawei ruh ka seng ka lyngngoh ban ïohi ba hadien ka jingduh noh u Transformer namar ka jingsniew ym duna ïa ka lai bnai hynrei sngewphylla ba ïa ka bai bording pat la kheiñ kumjuh hi wat hadien bym ïoh pyndon kam ïa ka bording.
Ka seng ka dawa na ka office treikam jong u AE ba u dei ban pynshai lane pynsngewthuh paidbah lyngba ki nongtrei jong u lane da kiba dei peit ïa ka Syndai SubSation halor kane ka mat khnang ba ki paidbah kin dup sngewthuh ha kano ka rukom la kheiñ kyllum ia ka bai bording khlem da ïoh pyndon kam ïa ka ha kito ki bnai ba sniew u Transformer.
Ha kajuh ka por ka seng ka kyrpad jur ïa u AE ba ym nym dei shuh ban dang ïai bteng ban jia long kumne hynrei u dei ban pyntikna ba ki nongtrei jong u lyngba ki Meter Reader ba dei sam ïa ka bai bording ba kim dei ban shu adjust lane antad na la ïng lane na ophis treikam ïa ka bai bording hynrei ki dei ban leit rung ne leit peit ha manla ki thiew ïing ban pyntikna kat kum ka jingpyndonkam jong ki ïa ka bording khnang ba ki meter jong ki ruh kin long ki ba ïaid beit ïaid ryntih bad ban long active ruh ha ka kam ka jam, pynkut ka kyrwoh ba la phah da ka seng.