Bym register case ki Pulit ïa ka ejahar byrngem mudui PIL ha HC ki paidbah Nongrim Nongladaw

Shillong, Naitung, 20: Ki paidbah nongshong shnong jong ka shnong Nongrim Nongladaw, Ribhoi District ki la kynnoh ba u Chairman jong ka Village Employment Councik (VEC) Nongrim Nongladaw u Bah Karbuis Lyngdoh bad ka Secretary ka Kong Pyntngenlang Shadap ki la pyndonkam bakla ïa ka pisa na ka skhim MGNREGS da kaba soi tuh ia ka jingsoi jong ki nongshong shnong khlem ka jingtip jong ki.
Ha ka jingïakren bad ki lad pathai khubor ha ka sngi Saitjaiñ, u Bah Wanpyndap Lapang kum u nongshong shnong jong ka shnong Nongrim Nongladaw u la ong, “hadien ba ka don ka jingpyntrei ïa ka projek Jal Jeevan Mission (JJM) hapoh ka shnong ngi dang pyrkhat ba ka dei ka jingpyntrei da u kontrak bad ban pynthikna ïa kata ngi la leit ban pan jingtip da ka Right to Information (RTI) na ka ophis jong u Block Development Officer (BDO) Bhoirymbong C&RD Block.”
Katkum ka jingïathuh jong u Bah Lapang, ki ar tylli ki skhim ba la mang lyngba ka skhim MGNREGS ki dei ka jingshna ïa ki check dam hapoh ka shnong Nongrim Nongladaw.
“Kane ka la pynkyndit ïa ngi haba ngi lap lyngba ka RTI ba ha ka “Form Dawa Kam” ngi lap ba bun na ki Job Card Holder la shu soi tuh ïa ki jingsoi jong ki,” u la ong bad ïathuh ba ki nongshong shnong kiba la shah soi tuh ki la leit ban ujor da ka ejahar ha Khapmara PIC.
“Hadien ba ki Pulit kim shym la register case ïa ka jingmudui ngi la leit mih sha ka ophis jong u Superintendet of Police ban buh ïa ka jingujor. Namar ka jingbym leh eiei na ka ophis jong u SP, ngi la phah ruh ïa ka jingpynkynmaw halor ka jingbym register case ïa ka ejahar.
“Katba ngi dang ïaid shakhmat ki dang don shuh shuh ki nongshong shnong kiba la wan shakhmat ban ujor halor ka jingbym soi ïa ka “Form Dawa Kam”. Ynda ngi la ujor ha ka sien kaba ar ha ka ophis jong u Deputy Commissioner, la phah ïa iwei i ophisar na ka ophis DRDA ban wan tohkit hapoh shnong tangba ka jingtohkit la i kumba ka dei pynbna ka Awareness Programme. Kane kam shym la pynhun ïa ngi haba ngi la shah soi tuh,” la ïathuh u Bah Lapang.
“Na ka jingsoi tuh ngi kwah ban lap ïa ka jingshisha, ngi khmihlynti ba kan don ka jingtohkit pynban kam shym la don kano kano ka lynti,” la ong u Bah Lapang bad bynrap, “ha kine ki sngi ngin sa pan RTI ruh na ka ophis jong u Deputy Commissioner ban tip kiei ki lad ki lynti ba ki la leh halor ki jingujor jong ngi. Watla ngim shym la ïoh jubab ngi la shim da ka rai baskhem ba ngin wad jingïarap da kaba ujor da ka Public Interest Litigation (PIL) ha Ingbishar High Court ban ïoh ïa ka hok.”
“Kum ki Job Card Holder ki bym don jingtip eiei haor kine ki projek hynrei ïa ki jingsoi jong ngi la shu soi thok. Ha ka shnong jong ngi, ngi mad ïa ki kynrum kynram hapoh shnong bad kaba pynkyndit ïa ngi na kane ka kynrum kynram ka long ba u Chairman bad ka Secretary ki shim kabu pynban da kumne,” la pynpaw u Bah Lapang.
Shuh shuh u la ïathuh ba u Chairman bad ka Secretary ki la lum jingïalang mynta ka sngi Saitjaiñ bad wanrah sa kawei pat ka Work Order. “Ngi kyndit haba ngi dang khmihlynti ba kan don shwa ka jingpynbeit ïa ki projek hynrei ngi sngewdiaw haba ngi la leit ujor sha ki bor ki bahalor ngim shym la ïoh ïa kano kano ka jubab na ki,” u la ong.
“Ngi lap ba ha ka ‘Form Dawa Kam’ ba ki don ki Job Card Holder ki bym don hapoh shnong bad ki don ruh kiba la ïap. Dei na kata ka daw, ngi la kyrpad ïa ki bor jong ka aiñ ban tohkit halor kane. Ngi sngewdiaw shibun ba ka tnat Pulit kam shym la register case ïa ka jingujor jong ngi,” la bynrap shuh shuh u Bah Lapang.