Bym pyntreikam ïa ka ATS ba ïasoi ki ANVC bad ki 2 sorkar shah ktah jur ka ri lum Garo

Tura, Jylliew 23 : Ka jingshah rong ki jingkieng dieng ha ka jingshlei um ha kine ki sngi ha ri lum Garo kaba la pyndkut syndon ïa ka leit ka wad sha kiba bun bah ki shnong ka dei namar ka jingbym pyntreikam ïa ka Agreed Text Settlement (ATS) ba la ïasoi hapdeng ka ANVC, ANVC-B bad ka sorkar pdeng bad sorkar jylla. Namar ha ka ATS ha ka para 6.3 la ïa mynjur ba kawei na ki kyndon ka long ban pynbha ïa ki surok, ki lynti syngkien ha ri lum Garo, ong u Chairman ba rim ka ANVC-B uba long ruh mynta u MDC ka Tura u Bernard N Marak.
Hadien ba ka BJP ka la wan ha ka bor ban synshar ka la rai ban pynduh pyndam noh ïa ki kynhun kieng atiar da kaba ïasoi ïaki soskular bad ki kynhun kaikhlaw. Hynrei barobor ïaka sorkar pdeng la ïalam bakla beit da ki sorkar jylla namar ba ym shym la pyntreikam ïa kiei kiba la ïamynjur. Wat ka Monitoring Committee ruh kam ju ïa kynduh ban bud dien ïa kiba la ïa mynjur bad kaei kaba jia mynta ha ri lum Garo shah rong bun ki jingkieng bad dkut ki surok bad mad jingeh ki paidbah.
Ka sorkar pdeng bad sorkar jylla ki la pyrshang hi ban leh ei ei bad pyndep ïaki projek kum ka surok Shillong-Nongstoin-Tura bad hadien kane la dep mang ha ka Plan san snem kaba 12 jongka sorkar pdeng ban pynbha ruh ïaki surok ha baroh ki district.
Kat kum ka plan san snem kaba 12 la dep mang ba baroh ki jingkieng dieng ha ri lum Garo yn shna noh da ki jingkieng dewbilat.Nalor kane sa kawei ka surok bah ban pynïasoh ia ka Dhubri-Garo Hills bad ka Khasi Hills ruh la dep mynjur da ka MORTH jongka sorkar pdeng. Hynrei ïa kine ym shym la bud dien bad ki kam ki sahkut lut.
Ka daw baroh ka long ba ïa ka Monitoring Committee ym shym la pynlong man la ka hynriew bnai kumba la dep ïa mynjur. ïa ka ATS la pynkheiñ ha kiba bun ki bynta da ka sorkar kaba mynshwa bad wat kaba mynta ruh. Kine ki surok bad jingkieng ha ri lum Garo kin ym julor haduh katne katne lada dei ba don ka jingbud dien da ka Monitoring Committee.