Shillong, Naitung 17: Ka jingbym lah ban pynshongbha ne ban pynïaid bha ïa ki bun tylli ki pipe um kiba don ha kawei na ki lynti ïaid kjat ha ka shnong Mawkhar Shillong ka la pynmynsaw ïa bun ngut ki briew kiba ïaid lynti manla ka Sngi.
Na ka liang u nongthoh khubor u la ju lap bad ïohi manla ka por ba ki briew ki shait jynthut bad ur ha madan ba shah boh ha kine ki pipe bad dang ha ka janmied Sngi Balang nalor ba lah dum bad slap artat, la ïohi uwei u Rangbah briew u la ur ha madan ba shah boh ha ki pipe um.
La ïohi ruh ba ka jingpynïaid bad pynshongbha ïa ki pipe um kam long kaba biang namar kam shym la don satia ka jingtap da ka dewbilat, kumta la dei ïa ki bor ba dei khmih ban leh eiei halor kane ka kam.
Ka jingma lehse kaba lah ban mih na kane ka jingbym pynshong bha ïa ki pipe um kan ktah bha ruh wat ïa ki khynnah skul kiba ju ïaid na kane ka lynti manla ka sngi khamtam ha ka por ba ki dang ïa muja ban ïalehkai bad ïa beh thong iwei ia iwei pat ne ban ïa mareh na kane ka lynti ïaid kjat.
Katto katne ngut na kiba shong dukan harud kane ka lynti ïaid kjat ki la ïathuh ruh ha u nongthoh khubor ba ki la ïohi ba bun ruh na ki khynnah skul ki la ju shah boh ha kine ki pipe ha ka por ba kim poi pyrkhat ban peit sha madan.
Kumta ka long kaba donkam ïa ki bor khmih ba dei peit ba kin shim khia noh mar mar ban peit ba ka jingpynshong ïa kine ki pipe um kan long lyngba ka lynti kaba dei bad kumjuh ruh ba kin tap noh da ka dew bilat ha kane ka jaka ba la siang bad pynïaid ïa kitei ki pipe um.
