Shillong, Naitung 08: Da ki phew ngut ki samla shynrang bad kynthei kiba kynthup ïa ki Khasi, Jaintia bad Garo ha ka sngi Thohdieng ka 8 tarik u Naitung, 2022 ki ïalum paidbah ha khmat u Motdur jong u Kiang Nangbah uba don hajan ka Shillong Civil Hospital, ban dawa ïa ka tnat ka Kam Pohïing ka Sorkar Jylla ba kan pynbna paidbah noh ïa ka result kaba ladep pynlong ïa ka jingthoh eksamin naduh u snem 2019 na bynta ban iohrung ka kam ha ka tnat pulit ka jylla.
Haba kren sha ki lad pathai khubor kine ki samla ki la buh jingkylli ruh ïa ka Sorkar Jylla halor kaei ka nongrim ba ka tnat Pulit ka la pynslem jin haduh lai snem kynthih tang ban pynmih ïa ka result. Ngi dawa na ka sorkar ba ka dei ban pynbna noh ïa ka result namar kane ka jingpynlem kan buh jingeh khmatam ïa kito kiba la kham heh ka rta ioh kloi ba poi sha ka overage.
Kine ki samla ki la dawa ruh na u Myntri Rangbah ka jylla bad ïa u Bah Lahkmen Rymbui, myntri ba peit ïa ka tnat Pohïing ba ki dei ban shim khia ïa kane ka kam ym ban shu ai daw bad kynnoh ha ka Roster System. Shuh shuh kine ki samla ki la ai por ïa ka sorkar ba ka dei ban pyndep noh ïa kane ka kam tang hapoh ar taiew.
Shuh shuh kine samla ki la thmu ban leit tur sha Secretariat hynrei ki la shah khang khang ha ki majistor namar ka jingpynjari ïa ka kyndon 144 Cr.PC
