Bym peit lem ki bor ba halor, maramot hi ki paidbah jong ki 5 tylli ki shnong
Mawkyrwat, ‘Naitung 08: Ki 5 tylli ki shnong jong ka thaiñ Manad Area, South West Khasi Hills District kiba kynthup ïa ka shnong Manad, Pyndenlyngdoh, Lummawbah, Mawbidong bad Pyndensohlang mynta ka sngi ka 8 tarik u Naitung 2024 ki la ïa mih paidbah ban maramot ïa ka surok kaba la sniew sha ba palat kaba wanrah ka jingsyrtok ïa ki paidbah ha ka leit ka wan na ka daw ka jingshah rong noh ka surok ha ka um na ka jingwan jong u slap uba jur.
U bah Reddy Shylla uba dei kum u Chairman jong ka Synjuk ki Rangbah Shnong jong ki 5 Shnong haba kren ha ki lad pathai khubor u la ong ba kane ka surok kaba don ïa ka jingjngai kumba 6 kilometre ei ei na shnong Pyndenlyngdoh hynrei ka shim por pat kumba 1 kynta tam haba ïaid da ki kali haduh da poi ha surok rong ha shnong Photjaud, South West Khasi Hills District.
Related Posts
Kumta, na ka liang ki 5 shnong ki la buh ka jingkyrpad ïa ki nongmihkhmat jong ka Mawkyrwat Constituency bad kumjuh ruh ïa ka sorkar lyngba ka tnad PWD (Roads) ba kin phai khmat lem ryngkat ka jingmang pisa ban siang rong noh ïa ka surok Photjaud sha Manad – Mawbidong namar ka i donkam palat. Shuh shuh u bah Reddy Shylla u la ïathuh ba lada don lei lei kiba pang ba shitom khamtam eh kiba ar met ki ban pynpoi ïa ki sha ki jaka sumar kum ha Mawkyrwat bunsien ki don ki bym poi ha ki jaka sumar bad poi ruh ha u pud ba ki khlad noh tang ha shiteng lynti.
Haba kren ha kaba ïa dei bad ka Health Sub-Centre ha Pyndenlyngdoh, u bah Reddy Shylla u la ong ba watla ka la don bad pynïeng ïa ka jingtei hynrei haduh kine ki sngi na ka liang ka Sorkar lyngba ka tnad ka koid ka khiah kam pat shym la lah ban plie ne pyntreikam pura ïa kane ka jaka ai jingsumar.
Namarkata, la i donkam palat ban pyntrei kam noh mardor ïa kane ka Health Sub-Centre kaba don ha Pyndenlyngdoh, South West Khasi Hills District khnang ba kan long ka jingmyntoi ïa ki paidbah jong ka dong ka thaiñ khamtam eh ïa ki san tylli ki shnong kata ka Shnong Manad, Pyndenlyngdoh, Lummawbah, Mawbidong bad Pyndensohlang.