Shillong, Lber, 22: Ki nonghikai skul Adhoc kiba don hapoh ka shatri jong ka Federation of All School Teachers of Meghalaya (FASToM) ha ka sngi Baar ki la bteng ïa ka jingïakhih kaba jai jai da kaba ïaid paidbah na jan ka ophis treikam jong ka All India Radio sha madan Malki namar ka jingleh bym patiaw jong ka Sorkar halor ki mat jingdawa ban kyntiew kyrdan Deficit System/Deficit Pattern ïa ki skul Adhoc bad ban pynkiew noh ïa ka jingsiew tulop sha ki nonghikai skul Adhoc.
Ïa mynta, ki Nonghikai skul Adhoc Lower Primary ki ïoh jingsiew tang T. 12,000 shi bnai, ki nonghikai Upper Primary ki ïoh T. 16,000 shi bnai, ki nonghikai Secondary ïoh T. 20,000 shi bnai bad ki nonghikai Higher Secondary ki ïoh T. 24,000 shi bnai.
Namar ka jingbthah jong ka Deputy Commissioner jong ka East Khasi Hills District, la sakhi ba ki don tang 20 ngut ki nonghikai kiba la ïohlad ban ïashim bynta ha ka jingïaid paidbah mynta ka sngi ban pynsngew ïa ki jingdawa sha ka Sorkar.
U Executive Member ka FASToM u Samla Mayborn Lyngdoh ha ka jingïakren bad ki lad pathai khubor u la ong ba ka Seng kan dang ïai bteng ïa ka jingïakhih katba ka Sorkar kam pat pynurlong ïa ki ar tylli ki mat jingdawa.
U la pyntip ruh ba ka FASToM ka la shim ïa ka rai ban pynlong sa ka jingïashong kyllaiñ myngngor ba khlem pud sngi hakhmat ka ophis treikam jong ka Meghalaya Board of School Education, Regional Office ha nongbah Shillong.
“Namarba ki nonghikai kin hap leit ap eksamin na ka jingdon jong ka eksamin SSLC bad HSSLC, ngi la rai ban ïa bujli manla ka san ngut ha ka shi sngi khnang ba kan ym ktah ïa ka eksamin jong ki khynnah. Ynda la kut ki eksamin, ngin sa pynjur ïa ki jingïakhih tad haduh ba ka Sorkar kan da pynurlong ïa ki jingdawa,” u la ong.
