Shillong, ïaïong, 05: Ka jingïakhih jong ki nonghikai skul Adhoc ban dawa ïa ka Sorkar Jylla ba kan pynkiew tulop bad ban kyntiew sha ka kyrdan Deficit ka la kynjoh mynta sha ka taiew kaba lai.
Haduh mynta ki nonghikai skul Adhoc ki dang ïai bteng ban shong kyllaiñ myngngor hakhmat ka khyrdop jong ka ophis treikam ka Meghalaya Board of School Education (MBoSE).
Ha ka lah sngi u Blei, ki nonghikai skul Adhoc ki la byrngem ban pynlong ïa ka jingïakhih paidbah kaba heh ha nongbah Shillong hadien ba la kut ka eksamin SSLC bad HSSLC lada ka Sorkar Jylla ka dang ïai leh mynthi ïa ki jingdawa.
“Ngi la lum lut ïa ki nonghikai skul Adhoc na baroh ki District jong ka jylla. Lada ka Sorkar ka dang sngap kyllut ïa ka jingïakhih, hadien ka eksamin SSLC bad HSSLC, ka FASToM kan pynlong da ka jingïakhih paidbah ha kaba yn ïashim bynta palat shiphew hajar ngut ki nonghikai,” ong u nongaiktien jong ka FASToM u Bah Mayborn Lyngdoh.
“Kane ka kynthup ïa ki 8000 hajar ngut ki nonghikai skul Adhoc, ki kurim jong ki, ki khun ki kti, ki khynnah skul, ki khynnah skul barim, bad ki paidbah ruh ki lah ban ïasnohkti lang,” ong u kyrwoh.
U la ong ba ka jingshim rai ban pynlong da ka jingdeng ribon iong baroh shitaiew haba leit sha skul ka ban long kum shibynta ban bteng ïa ka jingïakhih shwa ba ka FASToM kan pynlong ïa ka jingïakhih paidbah kaba heh ha nongbah Shillong.
