Shillong, Naitung 28: Ka seng Post Graduate Students’ Union (PGSU) bad ka Garo Students’ Union (GSU) jong ka North Eastern Hills University (NEHU) campus kaba ha Tura ki la kyrpad ïa ka Pro Vice-Chancellor ban sdang noh ïa ka kam pynrungkam da kaba thep noh ïa ki kam kiba thylli ha ki administrative post.
Kitei ki seng ki la pynpaw ïa ka jingduna palat ki nongtrei hapoh ka administrative hapoh ka campus kaba ki la ong ba kane ka ktah ïa ka jingïaid beit ki kam bad baroh ki kam pynroi hapoh ka campus, ha kaba kane ka la ktah ruh ïa ka pule puthi bad ki kam ka bha ka miat jong ki samla pule.
Ka jingbym don ki nongtrei kumba donkam ka la nang pynkhia kam shuh shuh ïa ki nongtrei kiba don ha kaba kane ka la pynslem ruh ïa ki kam kiba dei ban pyndep kum ka jingpyllait ïa ki scholarship, ka jingpyllait ïa ki syrnot, ka jingsted ban jubab ïa ki jingkylli, ki jingtreikam bha ka general administrative bad kiwei kiwei.
“Kine ki jingduna ym tang ba ki ktah ïa ki kam ba manla ka sngi jong ki samla pule hynrei ka la pynhiardor ïa ka burom ka akor bad ka jingmih ki nonghikai kiba tbit bad kumjuh ruh ki nongtrei ba khlem hikai,” ki la bynrap.
Katkum ka jingong kitei ki union, ka NEHU ka dei ban pyndap ïa ki post Deputy Registrar, Personal Assistant sha Deputy Registrar, Assistant Registrar (Administration), Section Officer, Assistant, Upper Division Clerk (UDC) bad Lower Division Clerk (LDC).
“Kane ka jinglong jingman kumba ka long mynta ka la ktah ïa ka roi ka san bad ka jingïaid beit ki kam jong ka campus,” ong u President ka PGSU Chakram D. Sangma da kaba bynrap, “Ka donkam ïa ka kynhun kaba tbit hapoh ka administrative ka long kaba kongsan khnang ban pynthikna ban buh ïa ki jingthoh, nangta ka jingbha ki kam ki jam bad ka jingdonkam ban jubab ha ka por kaba biang khamtam ïa ki jingdonkam jong ki samla pule bad khamtam ba ïadei bad ki eksam.”
Kumba long mynta ka NEHU Tura Campus ka don tang 3 ngut ki nongtrei permanent bad ki regular staff. Kane ka jingduna kaba khraw bha ka la ktah ïa ka jingkiew ka campus bad ka la wanrah ka jingeh kaba bun ïa ki samla pule bad ïa ka NEHU baroh kawei kaba don ha Tura, ong ka union.
