Bym pat shai bha ka jingthmu ai wai sha ki Company ïa ka MeECL ha Amlarem
Dawa pynsangeh shwa ka Synjuk ki Waheh Shnong War Jaiñtia
Jowai, Nailur 24: U President ka Synjuk ki Waheh Shnong War Jaiñtia u ma Daniel Khongsit uba pyntip ba ka Synjuk kala dawa jur na ka sorkar ban kan pynsangeh shwa ïa ka jingthmu ban ai wai sha ki Company ïa ka tnad bording Sub-Division jong ka MeECL kaba don ha Amlarem West Jaiñtia Hills District.
Ha ka kyrwoh ula ïathuh ba kane ka jingpynkhreh jong ka sorkar ban aiti sha ki Company kan ym lah satia ban pdiang namar kiba bun na ki nongshong shnong jong katei ka thiañ kim pat ïoh satia ka jingshai kaba bniah halor katei ka jingthum bad kane ka jingthmu ka lah ruh ban wanrah jingeh hadien habud ïa ki paidbah nongshong shnong kumba jia ïa ki Company Mobile namar wat tang ban leit ujor ruh ym shem ïa ka jaka, la ong u ma Khongsit.
La ïathuh katkum ka rai jong ka Synjuk haka jingïalang (meeting) kaba la long haka 15 tarik u Nailur, 2022 ha Enowel Hall Amlarem da kawei ka sur kila dawa jur na ka sorkar ba ka dei ban pynsangeh shwa ïa kane ka kam katba ym pat ïoh ïa ka jingshai kaba bniah.
Halor kane ka Synjuk Waheh Shnong jong ka War Jaiñtia Amlarem ha kane ka 22 tarik kala leit kynduh ïa u CMD uba dei u Chief Secretary jong ka jylla bad ïa u Director Distribution jong ka MeECL ha Lumjingshai Shillong bad naka liang jong ki kila ong ba ki kloi ban pdiang ïaka jingdawa ka Synjuk ban pynsangeh shwa.
Ha ka juh ka por kila kular ruh ban leit ai jingpynshai hashwa ban pyntreikam la ki paidbah kin pdiang ne em, ha katei hi ka sngi ka Synjuk kala leit ban kynduh ruh ïa u Power Minister u bah Prestone Tynsong bad ïa u ma Lahkmen Rymbui MLA ka thiañ, na ka liang jong ki ruh kila kloi ban leh ïakaba donkam naka bynta ka jingbha jingmiat jong uba bun balang.
Katkum ka jingïathuh jong u ma Daniel Khongsit ba ka sorkar kala don jingthmu ban aiti sha ki Company ïa ki 8 tylli ki Block/Sud-Division jong ka tnad bording na ka bynta ban pynheh ne ‘Preparation for expansion of Distribution Franchises” katkum ka shithi na ka MPDCL bad kine ki kynthup ïa ka Bagmara, Chokpot, Mahendraganj, Pynursla, Mawryngkneng, Umsniang, Riangdo bad ka Amlarem.