Bym pat shah die ïa ki dohkha ba wan nabar, hiar ka kamai kiba im ja na Basa Dohkha

Shillong, Jylliew 18: Ka jingkhang wanrah dohkha na shabar ka Jylla kum na Andhra Pradesh ka la ïaid mynta la 11 sngi eiei naduh ba la pynjari da ka sorkar jylla lyngba ka Commissioner of Food and Safety hadien ka jinglap ïa ka jingdon u Formalin ha ki dohkha ba la shim nongmuna ban eksamin.
Kane ka jingkhang ban wanrah ïa ki dohkha la ïohi ïa ka jingkynjah jar ka basa dohkha ha Ïewduh kaba dei ka pdeng duh jong ka jingpynpoi bad shalan dohkha sha kiwei pat ki bynta ka Ri-lum Khasi.
Na ka liang u Mawphor ha ka sngi Saitjaiñ u la leit ban buddien ïa kane ka long ka man ha basa dohkha ha Ïewduh, bad ha ka jingleit buddien la lap ba ka ïew die dohkha ka dang kynjah jar jar. Pynban watla katta ruh, hadien ba la shah ban die tang ïa ki dohkha ba pynmih na ka jylla bad kiba wanrah na Assam, bad watla ka dor ka kham rem, hynrei ki don ki dukan kiba la plie ban ïoh die bad ban ïaksaid khnang ba ki lah ban pyndap ïa ki jingdonkam ha ïing hasem kumba ki ju ïoh kamai barorbor na ka kane ka kam.
Haba ïoh ban ïakren bad kawei na ki nongdie dohkha ka la ong ba mynshuwa kam ju don kum kane ka jingïaknieh dohkha namar ïa ki dohkha ki la wan pynpoi hi ha ka jaka ba ki shong die. Nalor kata ka la ïathuh ba naduh ba la pynsangeh wanrah dohkha na shabar, ka la ktah shi katdei eh ïa ka kamai kajih jong ki ba ki paidbah kim sngewtynnad shuh ban thied bad ba ka dor ruh ka lah kham rem.
“Ym tang ma ngi kiba die dohkha kiba shah ktah ka kamai ka jih hynrei ka jingshah ktah eh ka dei khamtam ïa ki daju kiba im ja na ka jingkit ïa ki mar kiba poi ha ïew hynrei mynta ba khang ïa ki dohkha nabar tang shipawa ki daju ruh kim ïoh kam shuh bad ym tang katta wat kito kiba im ja na ka die sha ruh ki shah ktah lang,” ka la ong.
Halor kane ka jingpynbna jong ka Commissioner of Food and Safety ba ïa ki dohkha la lap ai injek formalin, la ïohi ba ka don ka jingsngew khohñioh na ki paidbah ban bam dohkha bad la ïohi ba ki paidbah ki la sdang ban ïabeh ban thied da ka ktung.
Haba ïakren bad ki nongdie ktung ki la ïathuh ba da kane ka jingkhang ka sorkar ïa ka jingwanpoi ki dohkha na bar jylla khamtam eh na Andra Pradesh ka ïew die ktung mynta ka la kham ïaid ïew.