Bym pat pynlong ïa ktien Khasi ka ktien sorkar, hap pyndonkam beit da ka phareng ha kiba bun ki kam: KAS

Shillong, Jylliew 08: Ka jingdawa ban ithuh ne ban pynlong ïa ka ktien Khasi kum ka ktien Sorkar ne Official Language ka la nangjur katba dang mih ki sngi. Kane ka la paw bad mih biang mynta ha ka jingïalang ne ka dorbar bah pyllun jong ka Khasi Authors’ Society kaba la dawa ïa ka sorkar ban pynurlong kane ka mat kaba kongsan.
“Ka Ktien Khasi ka la dei kawei na ki ktien ha kane ka thaiñ shatei lammihngi kaba la kham paw khmat bha, kumta ngi kwah ba ka sorkar jylla kadei ban pynlong noh ïa ka Ktien Khasi kum ka ktien sorkar,” ong u President ka KAS u Dr. D.R.L. Nonglait haba kren sha ki lad pathai khubor hadien ba la wai ka jingïalang ka Dorbar Pyllun ha ka sngi Saitjaiñ hapoh ka Ïing dorbar jong ka Jaïaw Shyiap bad Lumpyllon.
Haba kylli la kane ka lah ban long ïa ka sorkar ban pyntreikam ïa kane ka jingdawa, u Dr. Nonglait u la ïathuh ba kane ka kam, kam don jingeh satia naba kadei ka kamram jong ka sorkar jylla ban pynlong bad mynjur ïa ka Ktien Khasi kum ka ktien sorkar.
“Kum ka jylla Mizoram ka Ktien Mizo ka dei ka ktien sorkar, kumjuh ruh ha Assam ka ktien Assamese ka dei ka ktien sorkar ne official language, kumta kam don ka jingeh ïa ka sorkar jylla Meghalaya ban pynurlong ïa kane ka jingthmu lada ka sorkar ka mon,” u la ïathuh.
Ha kaba ïadei bad kane, u President ka KAS u la ïathuh, “Ba lada urlong kane ka jingdawa ban pynlong ïa ka Ktien Khasi kum ka Official Language kaba mut ha ki skul ngin lah ban hikai da ka ktien Khasi, ki kot ruh la lah ban thoh ha ka ktien lajong, bad kumjuh ruh ki shithi kiba wan na ki tnat sorkar ruh kin long beit ha ka ktien Khasi bad lada ngi la lah ban sdang shwa na lade ne na la ka jong ka jylla kan pyni sha ka sorkar pdeng ba ka jylla ka burom ïa ka ktien lajong bad kan sa shim khia ruh ban pynkloi noh ban pynkylla bad pynbha thymmai noh ïa ka khyrnit kaba 8 bad ban pynrung bad ithuh noh ïa ka ktien Khasi hapoh kane ka khyrnit jong ka riti synshar jong ka ri.”
Haba ong namar ba kam pat shym la don ka jingshim khia jong ka sorkar jylla ban pynlong noh ïa ka Ktien Khasi kum ka ktien sorkar bun ki shithi, ki jingthoh bad kiwei la hap ban pyndonkam beit da ka ktien Phareng.
“Kumba ka long mynta lada ngi phah kino kino ki jingthoh ne ki shithi sha ki tnat sorkar la ka dei sha ki ophisar Khasi ruh hap pyndonkam beit da ka ktien phareng,” bynrap u President ka KAS.
U President ka KAS u la ong ruh ba ka seng ka la ïai dawa manla ka por na ka sorkar pdeng ban ithuh bad pynrung noh ïa ka ktien Khasi hapoh ka khyrnit kaba 8 jong ka riti synshar ka ri India. “Ngi la dep phah lut ïa ki jingthoh jong ngi sha ka President ka ri, sha u Myntri Rangbah duh ka ri, sha ka tnat ki Kam Pohïing ka sorkar pdeng bad kumjuh ruh sha u Myntri Rangbah ka jylla u Conrad K Sangma ban pynkloi noh ban pynbha ne pynkylla (Amend) ïa ka khyrnit kaba 8 bad ban pynrung lang noh ïa ka ktien ka Khasi bad lada ka sorkar pdeng ka dang ïai kuman ka seng kam banse ban pynlong ki jingïakhih kum ka jingïaid paidbah, ka jingïalang ba heh bad kiwei ki prokram ban pynbor ïa ka sorkar pdeng ban pynurlong ïa kane ka jingdawa kaba shong nongrim,” u la bynrap.
Lah ban ong ba ka dorbar ka la sdang da kaba kynmaw tympang ïa ki dkhot ba la khlad noh, Bah Maurice G Lyngdoh bad Bah Darlingstone Dkhar (bam kwai ha Dwar U Blei) bad la bud ryngkhi da ki ktien lamphrang na u khliehduh Dr D R L Nonglait bad ka kaiphot na u Saiñpyniar, Dr Ronald P Kharshiing.
Kiwei kiwei ki mat ba kongsan ba la ïatai ha ka dorbar ka dei halor kaba ïakhun ban pynrung ïa ka ktien Khasi sha ka Khyrnit ba 8 jong ka Riti Synshar ka Ri India, kaba pynmih ïa ka dictionary na ka ktien Khasi sha ka Khasi bad sha ka ktien phareng (English) bad byllai ki kam rakhe ïa ki riewkhraw kum u Thomas Jones, Soso Tham bad kiwei kiwei ki jingïalang sah kynmaw ha baroh shisnem.
La pdiang dkhot ruh ïa ki nongthoh thymmai kiba kynthup ïa u Bah Kitbok Nongkhlaw, Dr Badahunshisha Jana, Bah Banjop Leo G Kharmalki, Kong Frugiferous Diengdoh, Kong Jennifer Lyngkhoi, Kong Elisabeth Shylla, Dr Heipor Uni Bang, Dr Herina Dohtdong, Dr Rosa Mystica Mawlong, Bah Rangkitbok C Dohkrut bad Kong Evanisha Pathaw.
Ki dkhot thymmai ba la jied kum ki nongkitkam ki long u Dr D R L Nonglait la ïaineh kum u Khlieh Rangbah, Dr K D Ramsiej, Symbud Khlieh Rangbah, Dr Ronald P Kharshiing, Saiñpyniar Lumlang, Dr Esmarjune Kharpan, Symbud Saiñpyniar, Bah Kitbok Nongkhlaw, Treasurer, Dr M M Khymdeit, Sainpyniar jong ka Jylli Pynmihkot (Publication Committee) bad san ngut ki dkhot ha ka lyngwiar ki dkhot rangbah ba kynthup ïa ka Prof Streamlet Dkhat, Dr Esther June Shongwan, Prof Badaplin War, Prof Desmond L Kharmawphlang, bad Bah Raphael Warjri. Ka jingïalang ka la banjur halor ka jingdonkam ban trei shitrhem ïa ki kam kiba dawa na ka bynta ki samla pule bad ka imlang sahlang baroh kawei ha ka liang ka ktien bad ka pule puthi ha kaba la pyrkhat thymmai ban pynsngew sha ka sorkar jylla ban pynlong noh ïa ka ktien Khasi kum ka ktien sorkar, khnang ban kham khia thew kiwei kiwei ki jingdawa jong ka seng ha ki bynta ki ba bun ha ka imlang sahlang.